स्थानीय तहको चुनावमा भाग लिने उम्मेदवारले व्यक्तिगत बेरुजु र पेश्की नरहेको घोषणा गर्नुपर्ने प्रावधानसहित निर्वाचन आयोगले आचारसंहिताको मस्यौदा तयार गरेकाे छ ।
उम्मेदवारी दर्ता गर्दा सम्बन्धित व्यक्तिले व्यक्तिगत बेरुजु र पेश्की नरहेको स्वघोषणा गरेको पत्र पनि साथै पेश गर्नुपर्ने प्रावधान आयोगकाे आचारसंहितामा राखिएको छ ।
निवार्चन आयोगका पदाधिकारीहरुले स्थानीय तहलाई पारदर्शी र सुशासनमैत्री बनाउने प्रयासका लागि यस्तो प्रावधान राखिएकाे बताए ।
उम्मेदवारले स्वघोषणा नगरे उम्मेदवारी खारेज पनि हुन सक्ने व्यवस्था आयोगकाे आचारसंहितामा राखिएकाे छ ।
निर्वाचन आयोगले तय गरेको आचारसंहितामा व्यक्तिगत बेरुजु फर्छ्योट गरेको छैन भने पनि चुनावमा उम्मेदवार हुन नपाउने उल्लेख गरिएको छ ।
आचारसंहितामा लेखिए पनि उम्मेदवारहरुको व्यक्तिगत बेरुजु र पेश्की रहेको वा नरहेको अध्ययन गर्न काे जाने ? र कसले गर्ने भन्ने बारे आयोगले स्पष्ट पारेकाे छैन ।
अध्ययन र अनुसन्धानबारे केही नलेखिए पनि उम्मेदवारहरुले व्यक्तिगत स्वघोषणा गर्नै पर्ने आयोगद्धारा प्रस्तावित आचारसंहितामा उल्लेख छ ।
प्रधानमन्त्री शेरबहादुर देउवा नेतृत्वकाे सरकारले स्थानीय तहको निवार्चन देशैभर एकै चरणमा वैशाख ३० गते गर्ने निर्णय गरिसकेकाे छ ।
मिति तय भएसँगै स्थानीय तहको चुनावको सरगर्मी बढेकाे छ । विभिन्न दलका नेताहरुले आ–आफ्नाे उम्मेदवारी रहने भन्दै आन्तरिक तयारी समेत सुरू गरिसकेका छन् ।
