मन्त्रिपरिषद्को बैठकले स्थानीय तहको निर्वाचन आउँदो वैशाख ३० गते गर्ने निर्णय गरेको छ ।
नेपाल सरकारका प्रवक्ता एवम् सञ्चार तथा सूचना प्रविधिमन्त्री ज्ञानेन्द्रबहादुर कार्कीले आज पत्रकार सम्मेलनमा निर्वाचन मितिबारे जानकारी दिए ।
आज बसेको मन्त्रिपरिषद् बैठकले निर्वाचनकाे मितिबारे निर्णय गरेको हो ।
‘निर्वाचन आयोगको सिफारिसअनुसार सरकारले स्थानीय तहको निर्वाचन एकै चरणमा गर्ने निर्णय गरेको छ,’ सञ्चारकर्मीलाई जानकारी दिँदै मन्त्री कार्कीले भने ।
प्रधानमन्त्री शेरबहादुर देउवाले यसअघि प्रमुख निर्वाचन आयुक्त दिनेश थपलियासँग निर्वाचनका लागि निर्वाचन आयोगको तयारी र अवस्थाबारे सोधेका थिए ।
आयोगबाट सकारात्मक नतिजा आएपछि मन्त्रिपरिषद् बैठकले निर्वाचनको मिति घोषणा गरेको हो ।
नेपालको संविधानले पालिका अध्यक्ष, उपाध्यक्ष, वडाध्यक्ष र सदस्यको पदावधि निर्वाचित भएको मितिले पाँच वर्षको हुने उल्लेख गरेको छ ।
साथै, संविधानले जनप्रतिनिधिबिना स्थानीय तहको परिकल्पना गरेको छैन ।
स्थानीय तह निर्वाचन ऐन अनुसार वर्तमान स्थानीय जनप्रतिनिधिको कार्यकाल २०७९ जेठ ५ गते सकिँदैछ ।
त्यसैले देउवा नेतृत्वकाे सरकारलाई निर्वाचनकाे उपर्युक्त मिति सार्वजनिक गर्न चर्काे दबाब परिरहेकाे थियाे ।
यसअघि प्रस्तावित निर्वाचनको मिति (जेठ १८ गते) मा निर्वाचन भए स्थानीय तह केही दिनका लागि जनप्रतिनिधिविहीन हुने हुँदा वर्तमान सरकार झनै समस्यामा परिरहेकाे थियाे ।
यता प्रमुख प्रतिपक्षी दल नेकपा एमालेले स्थानीय तहकाे निर्वाचनका लागि मिति ताेक्न ताकेता गरिरहेकाे बेला संविधानको व्यवस्थालाई मध्यनजर गर्दै सरकारले निर्वाचन आयोगसँग छलफल गरी निर्वाचनको नयाँ मिति घोषणा गरेको छ ।
