बेलायती नम्बर वान टेनिस स्टार एम्मा राडुकानुलाई पछ्याएको आरोपमा एक जनालाई अदालतले दोषी ठहर गरेका छन् ।
राडुकानुलाई उनको घरसम्मै पछ्याएको भन्दै ब्रमली म्याजिस्ट्रेट अदालतले अमृत मगरलाई दोषी ठहर गरेको हो ।
मगरलाई शुक्रबार दोषी ठहर गर्दै सो अदालतले जेल सजायसमेत तोकेको छ ।
तथापि, मगरलाई अर्को महिना जेल पठाइने बताइएको छ ।
हाल मगरलाई राडुकानुसँग सम्पर्क नगर्ने र उनीहरू बसेको क्षेत्रमा नजाने शर्तसहित जमानतमा छाडिएको छ ।
३५ वर्षीय मगर नेपाली रहेकाे आशङ्का छ ।
उनले राडुकानुका लागि लेखेको पत्रमा पत्नीको नाम ‘बिना’ उल्लेख गरेका कारण पनि उनी नेपाली रहेको आशङ्का गरिएको हो ।
विवाहित मगर इड्कवेयर बस्दै आएको बताइएको छ ।
उनले पहिला डेलिभरी ड्राइभरको काम गर्ने सूचना प्राप्त भए पनि उनको पहिचानबारे विस्तृत आएको छैन ।
नामको आधारमा मगर नेपाली मूलको रहेजस्तो देखिएपनि उनको कानुनी पहिचानबारे कतै उल्लेख छैन ।
बिबिसीका अनुसार मगरले तीनपटक राडुकानुको दक्षिण लन्डनस्थित घरमा पुगेर उनलाई सताएका थिए ।
त्यसबाहेक मगरले खेलाडी राडुकानुका बुबाको जुत्ता चिनो हुन्छ भन्दै चोरेको पनि डेली मेलमा उल्लेख छ ।
मगर पहिलो पटक सन् २०२१ नोभेम्बर २३ मा राडुकानुको घर गए थिए ।
त्यसबेला उनी एउटा हातमा फूल र अर्को हातमा पत्र बोकेर त्यहाँ पुगेका थिए ।
पत्रमा उनकी पत्नी ‘बिना’ र कुकुर ‘लोगन’को नाम पनि उल्लेख थियो ।
पत्रमा लेखिएको थियो, ‘भन्नलाई केही छैन, तिमी मायाको हकदार छौ । मेरो तर्फबाट अनि बिना र लोगनको तर्फबाट ।’
पछि डिसेम्बर महिनामा भने उनी बारम्बार त्यहाँ पुगेका थिए ।
राडुकानुले प्रहरीलाई भनेकी छन्, ‘यो घटनापछि मैले असुरक्षित अनुभूति गरिरहेकी छु । बाटोमा हिँड्दासमेत बारम्बार पछाडि फर्किएर हिँड्ने गरेकी छु ।’
गत वर्ष बेरोजगार भएका बेलामा मगरले टोरन्टोमा जन्मिएकी ब्रिटिस नम्बर एक खेलाडी तथा युएस ओपनकी विजेता राडुकानुको खेल टेलिभिजनमा हेरेका थिए ।
त्यसपछि उनी सोध्दै–खोज्दै दक्षिण लन्डनस्थित उनको घर पुगेका थिए ।
मगरले अर्को पटक आफू झन्डै २३ माइल टाढा उत्तरी लन्डनबाट भेट हुने आशामा आएको लेखेर छाडेका थिए ।
गत वर्षको डिसेम्बर ४ मा उनले राडुकानुको बगैँचामा क्रिसमसको सजावट गरेपछि उनका बुबा इयानको जुत्ता लिएर गएका थिए ।
राडुकानुका बुबाले ढोकामा राखेको क्यामेराबाट मगर पहिला पनि आएको पहिचान गरेपछि उनलाई पछ्याउँदै गएर प्रहरीलाई खबर गरेका थिए ।
उनी पक्राउ पर्दा प्रहरीले ब्यागमा जुत्ता फेला परेको समाचारमा उल्लेख छ ।
उनले चिनो हुन्छ भनेर जुत्ता लगेको बताएका थिए ।
यो पनि :
नेपालले तोड्यो जितको खडेरी, विमलको निर्णायक गोलमा मोरिससलाई हरायो !
