कोरोना भाइरसविरुद्धको दोस्रो डोज वा बुस्टर डोज लगाउँदा पहिला लगाएकै खोप लगाउन नपर्ने स्वास्थ्य तथा जनसङ्ख्या मन्त्रालयले जनाएको छ ।
मन्त्रालयको माघ १४ गतेको मन्त्री स्तरीय निर्णय अनुसार बुस्टर मात्रा लगाउँदा पहिला लगाएकै खोप लगाउन नपर्ने भएको हो ।
डब्ल्युएचओ एसएजीई (स्टार्टेजिक एड्भाइजरी ग्रुप अफ एक्सपर्ट अन इम्युनिजेसन) र राष्ट्रिय खोप सल्लाहकार समितिले सिफारिस गरेको आधारमा सो निर्णय लिइएको हो ।
मन्त्रालयका अनुसार कोभिड-१९ विरुद्धको बुस्टर खोप प्रदान गर्दा ६० वर्ष भन्दा माथिका व्यक्तिहरूलाई पहिलो र दोस्रो डोज कोभिसिल्ड/एस्ट्राजेनेका/मोर्डना/फाइजर वा भेरोसेल खोप लगाएकाहरूलाई कोभिसिल्ड/एस्ट्राजेनेका खोप दिने निर्णय गरिएको छ ।
त्यस्तै, पहिलो मात्रा खोप लगाएकाहरूलाई दोश्रो मात्रा दिन सोही खोप नभएमा पनि कोभिसिल्ड/एस्ट्राजेनेका खोप दिइने छ ।
यसबाहेक विदेशमा कोभिसिल्ड/एस्ट्राजेनेका/भेरोसेल/मोर्डना वा फाइजर खोपको पहिलो डोज लगाएकाहरूलाई समेत दोश्रो डोजमा कोभिसिल्ड/एस्ट्राजेनेका खोप प्रदान गर्ने निर्णय भएको मन्त्रालयले जनाएको छ ।
