विश्वभर फैलिएको ओमिक्रोन भेरिएन्टले नयाँ भेरिएन्ट बनाउने जोखिम रहेको स्वास्थ्य मन्त्रालयले बताएकाे छ ।
मन्त्रालयअन्तर्गत रहेकाे इपिडिमियोलोजी तथा रोग नियन्त्रण महाशाखा (इडिसिडी)का प्रमुख कृष्णप्रसाद पाैडेलले ओमिक्रोन धेरै फैलिए नयाँ भेरिएन्ट भन्ने जाेखिम उच्च हुने बताएका छन् ।
‘भाइरसमा छिटोछिटो उत्परिवर्तन (म्युटेसन) हुने भएकाले ओमिक्रोन कमजोर भयो डेल्टा भेरिएन्टलाई विस्थापित गर्यो भनेर ढुक्क हुन सकिने अवस्था हुँदैन’ प्रमुख पाैडेलले भने ‘ ओमिक्रोन उत्परिवर्तन भएर आउनसक्ने भेरिएन्ट ओमिक्रोनभन्दा घातक र जटिल प्रकृतिको हुन सक्छ ।’
धेरै मानिसमा ओमिक्रोन संक्रमण भए म्युटेसनमार्फत झनै खतरनाक भेरिएन्ट देखिन सक्ने भन्दै उनले निरन्तर सावधानी अपनाउनु पर्नेतर्फ सचेत गराएका छन् ।
विश्वव्यापी रूपमा भएका अध्ययनले समेत कोभिड–१९ को महामारी यतिमै सीमित नरहने निष्कर्ष निकालिसकेकाले स्वास्थ्य सुरक्षाका मापदण्ड पालना गर्नुकाे विकल्प नरहेकाे इडिसिडीका प्रमुख कृष्णप्रसाद पाैडेलले बताए ।
ओमिक्रोनभन्दा कडा भेरिएन्ट आएमा मात्र ओमिक्रोन विस्थापित हुने उनको भनाइ छ ।
