देशमा पारासिटामोल लगायत कुनै पनि अत्यावश्यक औषधिको अभाव नभएको स्वास्थ्य तथा जनसङ्ख्या मन्त्रालयले जनाएको छ ।
मन्त्रालयका सहप्रवक्ता डाक्टर समीरकुमार अधिकारीले सिटामोल लगायत कुनै पनि अत्यावश्यक औषधिको अभाव नभएको बताएका हुन् । देशमा सङ्क्रमण बढेसँगै धेरै निजी फार्मेसीहरूले सिटामोल नभएको भन्दै फर्काउने गरेका छन् । तर, सरकारी स्टोर तथा फार्मेसीमा गरी अहिले एक करोड १० लाखभन्दा बढी मात्रामा सिटामोल मौज्दात रहेको उनले बताए ।
उनका अनुसार स्वास्थ्य सेवा विभागको व्यवस्थापन महाशाखाअन्तर्गत पथलैया स्टोरमा १० लाख सिटामोल भण्डारण गरेर राखिएको र सरकारी फार्मेसीहरूमा एक करोडभन्दा बढी मात्रामा सिटामोल मौज्दात रहेको छ ।
सिटामोल लगायत आवश्यक औषधिको विवरण तत्काल अध्यावधिक गर्न सम्पूर्ण सरकारी अस्पताल, प्रादेशिक आपूर्ति व्यवस्थापन केन्द्रलाई निर्देशन गरिएको डा. अधिकारीको भनाइ छ ।
कुनै सरकारी अस्पतालमा पारासिटामोल कम हुने अवस्था आएमा नेसनल औषधि लिमिटेडसँग सीधै सम्झौता गरेर खरिद गर्न सकिने उनले बताए ।
