कोरोना भाइरसको ओमिक्रोन भेरिएन्टबाट सङ्क्रमण सरिसकेपछि लक्षण देखा पर्न लाग्ने अवधि पनि अन्य भेरिएन्टको तुलनामा कम हुने देखिएको छ ।
सङ्क्रमितसँगको सम्पर्कमा पुगेको व्यक्तिमा एक दिनमै शरीरमा भाइरसहरू बढ्न सुरु हुने स्पेनको इन्टरनेसनल युनिभर्सिटी अफ ला रियोजाका सङ्क्रामक रोग विशेषज्ञ डा. भिसेन्ट सोरियानो बताउँछन् ।
ओमिक्रोनबाट सङ्क्रमण भएमा दुईदेखि तीन दिनभित्र लक्षणहरू देखा पर्न सक्छन् । गत डिसेम्बरमा गरिएको अमेरिकी अध्ययनमा ओमिक्रोनको औसत सङ्क्रमण अवधि तीन दिन देखिएको थियो ।
ओमिक्रोन अघिका भेरिएन्टहरूबाट सङ्क्रमण सरिसकेपछि लक्षण देखा पर्न पाँचदेखि छ दिनसम्म लाग्ने गरेको थियो । डा. सोरियानिका अनुसार ओमिक्रोन केहि मानिसमा तीनदेखि चार दिन मात्रै वा सात दिनसम्म शरीरमा रहने देखिएको छ ।
लक्षण देखिएको सात दिनपछि लक्षण नभएका सङ्क्रमितले अरूलाई सङ्क्रमण फैलाउन नसक्ने उनको भनाइ छ । भाइरस पाँच दिनसम्म मात्रै सङ्क्रामक हुने हुँदा परीक्षणमा पुष्टि भएको तीनदेखि पाँच दिनसम्म अरूलाई सर्न सक्ने उनले बताए ।
‘लक्षण नदेखिएका मानिस पनि लक्षण देखिए जस्तै सङ्क्रामक हुने र उनिहरूमा सङ्क्रमण रहिरहने अवधि पनि उस्तै हुन्छ’, उनले भने ।
