विराटनगरस्थित कोसी अस्पतालमा कार्यरत ९६ जना कर्मचारीलाई कोरोना सङ्क्रमण पुष्टि भएको छ ।
शुक्रबार दिउँसोसम्म अस्पतालमा कार्यरत ९६ कर्मचारीमा कोरोना सङ्क्रमण देखिएको अस्पतालका मेडिकल सुपरिटेन्डेन्ट डाक्टर चुमनलाल दासले शब्द एक्सप्रेसलाई जानकारी दिए ।
उनका अनुसार १७ जना डाक्टर, ३३ जना नर्सलाई कोरोना सङ्क्रमण भएको छ । यस्तै, परामेडिक्स, कार्यालय सहयोगी र सफाइ कर्मचारी गरेर अन्य ५० जना पनि कोरोनाबाट सङ्क्रमित बनेको दासले जानकारी दिए । यो पछिल्लो १० दिनयताको रेकर्ड हो ।
दिनानुदिन कोभिड सङ्क्रमित कर्मचारीको सङ्ख्या बढ्न थालेपछि आइतबारदेखि दुई विभाग बन्द गर्ने अस्पतालको योजना छ । आज बसेको बैठकमा आइसियु र शल्यक्रिया विभाग बन्द गर्नेबारे छलफल भएको थियो ।
अन्य विभागका तुलनामा आइसियु र शल्यक्रियाका धेरै कर्मचारी कोरोनाबाट सङ्क्रमित भएका छन् । काेसीमा अहिले करिब ९० डाक्टरसहित पाँच सय ५० कर्मचारी कार्यरत छन् । त्यसमध्ये ९६ जनामा कोभिड देखिएपछि जनशक्तिको अभाव पनि हुन थालेको छ ।
