नेपालका सात प्रदेशमध्ये ६ प्रदेशको नामकरण भइसकेको छ ।
सबै प्रदेशको स्थायी राजधानी तय भएपनि प्रदेश १ बाहेक अन्य सबै प्रदेशको नामकरण भइसकेको छ ।
पछिल्लोपटक प्रदेश २ ले नामकरण र राजधानी टुङ्गो लगायो ।
सोमबारको प्रदेशसभामा भएको मतदानमा प्रदेशको नाम ‘मधेस प्रदेश’ कायम भयो भने राजधानी जनकपुरधाम तोकियो ।
सात प्रदेशमध्ये सबैभन्दा पहिले तत्कालीन प्रदेश ६ ले आफ्नो प्रदेशको नाम कर्णाली र स्थायी राजधानी वीरेन्द्रनगर कायम गरेको थियो ।
सो प्रदेशले २०७४ फागुन १२ गते नाम र राजधानी टुङ्गो लगाएको थियो ।
त्यसपछि, प्रदेश ४ को प्रदेशसभाले २०७५ असार २२ गते आफ्नो नाम गण्डकी हुने तय गरेको थियो ।
त्यसअघि असार १८ गते नै राजधानी पोखरा कायम भएको थियो ।
२०७५ असोज १२ गते तत्कालीन प्रदेश ७ को प्रदेशसभाले आफ्नो प्रदेशको नाम सुदूरपश्चिम र राजधानी गोदावरी, कैलाली हुने तय गरेको थियो ।
यस्तै, तत्कालीन प्रदेश ३ को प्रदेशसभाले २०७६ पुस २७ गते प्रदेशको नाम वाग्मती र राजधानी हेटौँडा रहने टुङ्गो लगाएको थियो ।
त्यस्तै, प्रदेश ५ को प्रदेशसभाले २०७७ असोज २० गते प्रदेशको नाम लुम्बिनी र राजधानी राप्ती उपत्यका, दाङमा रहने टुङ्गो लगाएको थियो ।
अब, नामकरणको लागि प्रदेश १ मात्रै बाँकी छ । प्रदेश १ भने नामकरणमा पछुवा भएको छ । तथापि, १ नम्बर प्रदेशको स्थायी राजधानी भने विराटनगर कायम भइसकेको छ ।
२०७६ वैशाख २३ को प्रदेशसभा बैठकले प्रदेशको राजधानी विराटनगर कायम गरेको हो ।
संविधानमा प्रदेशसभाको दुई तिहाइ बहुमतले प्रदेशको नाम र स्थायी राजधानी तोक्न सक्ने व्यवस्था छ ।
