प्रदेश १ मा एकै दिन दुई सय ७२ जनामा कोरोना सङ्क्रमण पुष्टि भएको छ ।
पछिल्लो २४ घण्टामा ७ सय ३४ जनाको पिसिआर परीक्षण गर्दा दुई सय ३३ र दुई सय ८१ जनाको एन्टिजेन परीक्षण गर्दा ३९ जनामा कोरोना सङ्क्रमण पुष्टि भएको हो ।
प्रदेश १ सामाजिक विकास मन्त्रालयका अनुसार पिसिआर परीक्षणका आधारमा मोरङमा एक सय ४५, सुनसरीमा ३९, झापामा ३१, भोजपुर र पाँचथरमा एक-एक र प्रदेश १ बाहिरका १६ जनामा सङ्क्रमण देखिएको छ ।
मोरङको विराटनगरमा एक सय १९, बूढीगङ्गामा १३, सुनवर्षी र बेलबारीमा तीन-तीन, उर्लाबारी र सुनवर्षीमा दुई-दुई, कटहरी, धनपालथान र रतुवामाईमा एक-एक जनामा कोरोना पुष्टि भएको छ ।
यस्तै, सुनसरीको धरानमा १६, इटहरीमा ११, इनरुवामा पाँच, रामधुनीमा दुई, बर्जु र दुहवीमा एक-एक र स्थानीय तह नखुलेका तीन, झापाको मेचीनगरमा २०, विर्तामोडमा पाँच, भद्रपुर र कनकाईमा दुई-दुई, अर्जुनधारा र दमकमा एक-एक, भोजपुरको षडानन्द र पाँचथरको फिदिममा एक-एक र प्रदेश १ बाहिरका १६ जनामा सङ्क्रमण देखिएको हो ।
प्रदेश १ मा आज २२ जना कोरोना सङ्क्रमणमुक्त भएका छन् । सङ्क्रमणमुक्त हुनेमा १० महिला र १२ पुरुष रहेका छन् । पछिल्लो २४ घण्टामा कोरोना सङ्क्रमणबाट एक पुरुषको मृत्यु भएको छ । सक्रिय सङ्क्रमितको सङ्ख्या पाँच सय ९७ रहेको सामाजिक विकास मन्त्रालयले जनाएको छ ।
