कोरोना भाइरसको सङ्क्रमण तीव्र रुपले फैलिरहेको बेला अमेरिकामा रेबिजका कारण पाँच जनाको मृत्यु भएको छ ।
अमेरिकाको रोग नियन्त्रण तथा रोकथाम केन्द्र (सिडिसी)का अनुसार अमेरिकामा गत वर्ष (सन् २०२१ मा) रेबिजबाट पाँच जनाको मृत्यु भएको छ । जुन एक दशकको अवधिमा सबैभन्दा धेरै रहेको जनाइएको छ । मृत्यु हुनेमध्ये एक जना सात वर्षको बच्चा पनि थियो ।
रेबिज भएका तीनको मृत्यु पाँच हप्तामा भएको थियो । चमेरोको सम्पर्कमा आएपछि तीन देखि सात हप्तामा लक्षण देखिएका थिए । मृत्यु भएका पाँचमध्ये चार जनाले खोप लगाएका थिएनन् ।
चेमेरोको सम्पर्कबाट रेबिजको जोखिम बारे थाहा नपाएको कारण दुईजनाले खोप नलगाएको जनाइएको छ ।
एक पटक भाइरस मस्तिष्कमा पुगेपछि, मानिसलाई पानीसँग डर लाग्ने, अचेत हुने, अत्यधिक र्याल आउने र अन्य लक्षणहरू निम्त्याउँन सक्छ । अन्ततः सङ्क्रमित कोमा जान्छ र उसको मृत्यु हुन्छ । एक पटक लक्षणहरू सुरु भएपछि, रेबिज लगभग सधैँ घातक हुन्छ ।
सन् १९०० को दशकपछि हरेक वर्ष अमेरिकामा रेबिजका कारण एक सय बढीको मृत्यु हुने तथ्याङ्क छ । खोप, जनचेतना, जनावरको हेरविचारका कारण १९६० पछि बिरामीको सङ्ख्यामा कमि आएको थियो ।
सिडिसीको रिपोर्ट अनुसार २००७ मा चमेरोबाट फैलने रेबिज अत्यन्त कम थियो ।
सन् २०११ मा ६ जना, २०१८मा तीन जनाको मृत्यु भएको थियो । सन् २०१९ र २०२० मा रेबिजको सङ्क्रमण तथा मृत्यु समेत रिपोर्ट गरिएको थिएन ।
रेबिज सङ्क्रमण भएका कुकुर, स्याल, चमेरो जस्ता जनावरका कारण रेबिज फैलिन्छ । अमेरिकामा ७० प्रतिशत रेबिजको सङ्क्रमण चमेरोबाट हुने गरेको पाइएको छ ।
सिडिसीले मानिसलाई चमेरोको सम्पर्कमा नआउन र सम्पर्कमा आइहाले रेबिज भएनभएको र यसविरुद्ध खोप लिनका लागि तुरुन्त स्वास्थ्य विभाग वा जनावर नियन्त्रण केन्द्रमा जानकारी दिन सल्लाह दिएको छ ।
