ओमिक्रोन भेरिएन्टको सङ्क्रमण बढ्दै गए सरकारले स्मार्ट लकडाउन गर्ने तयारी गरेको छ ।
शुक्रबार सिँहदरबारमा बसेको कोभिड–१९ सङ्कट व्यवस्थापन केन्द्र (सीसीएमसी) निर्देशक समितिको बैठकमा देशमा ओमिक्रोन भेरिएन्ट बढ्दै गए आवश्यकता अनुसार स्मार्ट लकडाउन गर्ने विषयमा छलफल भएको हो ।
एकसाताको अवधिमा सङ्क्रमितको सङ्ख्या बढ्दै गएमा आवश्यकता अनुसार स्मार्ट लकडाउनमा जाने बिषयमा छलफल भएको स्वास्थ्यमन्त्री विरोध खतिवडाले जानकारी दिएका हुन्
केही क्षेत्र मात्र बन्द गर्नेगरी स्मार्ट लकडाउन गर्ने तयारी गरेको हो । उनले भने, ‘पहिलेजस्तो सबै क्षेत्र बन्द गर्ने सोचमा सरकार छैन । केही स्थान वा केही क्षेत्रमात्र बन्द गर्नेगरी स्मार्ट लकडाउनको अवधारणालाई अघि बढाइने छ ।’ भारतबाट प्रवेश गर्ने नाकामा कोरोना परीक्षणलाई प्रभावकारी बनाउने, सङ्क्रमितलाई राख्न आइसोलेसन वार्ड निर्माण गरिने उनको भनाइ छ ।
शुक्रबारमात्र नेपालमा नौ सय ६८ जनामा सङ्क्रमण पुष्टि भएको छ । त्यस्तै थप २४ जनामा ओमिक्रोन भेरीएन्ट देखिएको स्वास्थ्य तथा जनसङ्ख्या मन्त्रालयले जनाएको छ ।
