fgfgfgfg नेपाल सरकारले सबै अस्पताललाई तयारी अवस्थामा रहन निर्देशन दिएको छ ।
नेपालमा थप २४ जनामा ओमिक्रोन भेरिएन्ट पुष्टि भएसँगै सबै अस्पताललाई तयारी अवस्थामा रहन स्वास्थ्य तथा जनसङ्ख्या मन्त्रालयले निर्देशन दिएको हो । मन्त्रालयको अनुसार ओमिक्रोनले गर्दा हुनसक्ने अत्यधिक बिरामीको चापलाई ध्यानमा राख्दै सबै अस्पताललाई तयारी अवस्थामा रहन, उपचारका लागि आवश्यक पर्ने अक्सिजन लगायत अन्य सामग्रीको जोहो गर्न र स्वास्थ्यकर्मीलाई तयारी अवस्थामा रहन निर्देशन दिइएको छ ।
यसबाहेक नेपालका ६ वटा अस्पतालमा एस जिन स्क्रिनिङ गरिने भएको छ । मन्त्रालयले एस जिन स्क्रिनिङ गर्ने सुविधा वीर अस्पताल, निजामती कर्मचारी अस्पताल (सिभिल), वीरेन्द्र सैनिक अस्पताल, त्रिवि शिक्षण अस्पताल, प्रदेश जनस्वास्थ्य प्रयोगशाला प्रदेश २ र भेरी अस्पतालमा रहेको जानकारी दिएको हो ।
सीमानाकामा कोभिड–१९ को परीक्षणलाई थप सशक्त बनाइ सङ्क्रमितलाई आइसोलेसनमा राख्ने व्यवस्था गरिएको छ । साथै अन्य भेरिएन्ट जस्तै ओमिक्रोनबाट जोगिनका लागि जनस्वास्थ्यका मापदण्ड अपनाउन मन्त्रालयले आग्रह गरेको छ ।
