कोरोना भाइरसको ओमिक्रोन भेरिएन्टलाई हल्का रूपमा नलिन विश्व स्वास्थ्य सङ्गठन (डब्ल्युएचओ) ले चेतावनी दिएको छ ।
ओमिक्रोनले हुने रोग डेल्टा भेरिएन्ट भन्दा कम गम्भीर देखिन सक्ने भएपनि यसलाई हल्का रूपमा लिनु नहुने भन्दै डब्ल्युएचओका प्रमुख डाक्टर टेड्रोस गेब्रेयससले चेतावनी दिएका हुन् । उनका अनुसार विशेष गरी खोप लगाइएकाहरूमा ओमिक्रोन भेरिएन्ट डेल्टा भन्दा कम खतरनाक देखिन्छ । तर यसकारणले यसलाई हल्का रूपमा लिन नहुने उनको भनाइ छ ।
ओमिक्रोन भेरिएन्टका कारण तीव्र गतिमा फैलिरहेको कोरोना सङ्क्रमणले विश्वभरको स्वास्थ्य सेवामा दबाब बढाएको छ । विश्वभरका अस्पतालहरूमा भीड बढिरहेको उनको भनाइ छ ।
पहिलाको भेरिएन्टहरू जस्तै, ओमिक्रोनको कारण मानिसहरू अस्पतालमा भर्ना भइरहेको उनले बताएका छन् ।
पछिल्ला केहि अध्ययनले अत्यधिक सङ्क्रामक भएपनि ओमिक्रोनबाट सङ्क्रमित भएका मानिसमा अन्य भेरिएन्टको तुलनामा हल्का लक्षणहरू मात्र देखिने पत्ता लगाएको थियो ।
