दिल्लीमा पछिल्लो २४ घण्टामा १० हजारभन्दा बढी नयाँ सङ्क्रमित थपिएका छन् ।
दिल्ली सरकारले जारी गरेको स्वास्थ्य बुलेटिन अनुसार पछिल्लो २४ घण्टामा राज्यमा कुल १० हजार ६ सय ६५ जनामा सङ्क्रमण देखिएको छ । सोहि अवधिमा ८ जनाको मृत्यु समेत भएको छ । यसअघि मङ्गलबार दिल्लीमा कुल ५ हजार चार सय ८१ जनामा सङ्क्रमण देखिएको थियो ।
त्यस्तै, सोमबार चार हजार ९९ र आइतबार तीन हजार एक सय ९४ जनामा सङ्क्रमण देखिएको थियो । तथ्याङ्क अनुसार पछिल्लो २४ घण्टामा दिल्लीमा सङ्क्रमितको सङ्ख्या दोब्बरले वृद्धि भएको छ । तीन दिनमा सङ्क्रमितको सङ्ख्या तीन गुणाले बढेको छ ।
स्वास्थ्य विज्ञहरूका अनुसार दिल्लीमा पोजिटिभिटी रेट मङ्गलबार आठ दशलमव ३७ प्रतिशतको तुलनामा बढेर ११.८८ प्रतिशत पुगेको छ । दिल्लीमा सङ्क्रमण दर सोमबार ६ दशमलव पाँच प्रतिशत र आइतबार चार दशमलव ६ प्रतिशत रहेको थियो ।
पाँच प्रतिशत भन्दा बढीको सङ्क्रमण दरलाई खतरनाक मानिन्छ । दिल्लीमा सक्रिय बिरामीहरूको सङ्ख्या बढेर २३ हजार तीन सय सत पुगेको छ । जसमध्ये सात सय ८२ जना मात्र अस्पताल भर्ना भएका छन् ।
