भोटेकोशी बाढीमा खोज तथा उद्धार कार्यमा महत्वपूर्ण भूमिका निर्वाह गरेको नेपाल प्रहरीको केनाइन लियो देशभरका प्रहरी कुकुरमध्ये सर्वोत्कृष्ट घोषित भएको छ।
कुकुर तिहारको अवसर पारेर तिहारको दोस्रो दिन नेपाल प्रहरी केनाइन कार्यालयमा आयोजित कार्यक्रममा लियोलाई मेडल प्रदान गरिएको हो। अपराध अनुसन्धान विभागका डीआईजी ओम रानाले लियोलाई सम्मान गरेका थिए।
गत भदौ १० गते आएको भोटेकोशी बाढीपछि लियोले करिब एक महिनासम्म खोज तथा उद्धार अभियानमा काम गरेको थियो। उक्त क्रममा उसले केही व्यक्तिका शव तथा शरीरका टुक्रासमेत फेला पार्न सहयोग गरेको थियो।
ल्याब्राडोर जातको लियोले सन् २०२१ देखि नेपाल प्रहरीलाई खोज तथा उद्धार कार्यमा सहयोग गर्दै आएको छ। विपद्का बेला देखाएको सक्रियता र योगदानका आधारमा उसलाई देशभरका प्रहरी केनाइनमध्ये उत्कृष्ट छनोट गरिएको हो।
