विराटनगर । जर्मनीलाई हराउँदै इक्वाडर पहिलोपटक विश्वकपको नकआउट चरणमा पुगेको छ ।
अमेरिकाको न्यू जर्सीस्थित मेटलाइफ स्टेडियममा सम्पन्न फिफा विश्वकप २०२६ को समूह ‘ई’ अन्तर्गतको खेलमा इक्वाडरले जर्मनीलाई २–१ ले हराउँदै ऐतिहासिक रूपमा नकआउट चरणमा स्थान सुरक्षित गरेको हो ।
खेलको दोस्रो मिनेटमै लिरोय सानेले गोल गर्दै जर्मनीलाई अग्रता दिलाएका थिए । तर इक्वाडरले नवौं मिनेटमै निल्सन एङ्गुलोको गोलमार्फत खेल बराबरीमा ल्यायो । त्यसपछि दुवै टोलीले अवसर सिर्जना गरे पनि निर्णायक गोल ७७औँ मिनेटमा गोन्जालो प्लाटाले गर्दै इक्वाडरलाई २–१ को रोमाञ्चक जित दिलाए ।
यस जितसँगै इक्वाडर विश्वकपको नकआउट चरणमा २००६ पछि पहिलो पटक पुगेको हो । जर्मनी भने यसअघि नै अन्तिम ३२ मा स्थान सुरक्षित गरिसकेको थियो, त्यसैले हारका बाबजुद प्रतियोगिताबाट बाहिरिएको छैन ।
८० हजारभन्दा बढी दर्शक उपस्थित रहेको खेलमा इक्वाडरका समर्थकहरूको उत्साहपूर्ण साथले टोलीलाई थप ऊर्जा दिएको देखिएको थियो । अब इक्वाडरले अन्तिम ३२ मा आफ्नो अर्को प्रतिद्वन्द्वीको प्रतीक्षा गर्नेछ भने जर्मनीले पनि नकआउट चरणको तयारी अघि बढाउनेछ ।
