राष्ट्रिय सभाको बैठक स्थगित, दुई महत्त्वपूर्ण विधेयकमाथि सहमति खोजिँदै

काठमाडौं । राष्ट्रिय सभाको आज बस्ने तय भएको बैठक कार्यसूचीमा प्रवेश गर्नुअघि नै स्थगित भएको छ। बैठकमा प्रतिनिधिसभाबाट सन्देशसहित प्राप्त प्रतिनिधिसभा सदस्य निर्वाचन ऐन संशोधन विधेयक, २०८३ र मतदाता नामावली (पहिलो संशोधन) विधेयक, २०८३ पारित गर्ने कार्यसूची रहेको थियो।
तर विधेयकमाथि परेका संशोधन प्रस्तावबारे दलहरूबीच सहमति जुट्न नसकेपछि बैठक स्थगित गरिएको हो।
संसद् सचिवालय स्रोतका अनुसार दुवै विधेयकमा परेका संशोधनका विषयमा सरकार र विभिन्न दलबीच संवाद जारी छ। सहमतिका आधारमा विधेयकलाई अघि बढाउने प्रयासस्वरूप बैठक स्थगित गरेर थप छलफल थालिएको बताइएको छ।
यसैक्रममा सोविता गौतम ले राष्ट्रिय सभामा प्रतिनिधित्व गर्ने दलका नेताहरूसँग निरन्तर संवाद गरिरहेकी छन्। संशोधनका बुँदामा साझा धारणा बनाउने प्रयास भइरहेको जनाइएको छ।
प्रतिनिधिसभा सदस्य निर्वाचन ऐन संशोधन विधेयक र मतदाता नामावली संशोधन विधेयकमा समान रूपमा तीन–तीन वटा संशोधन प्रस्ताव दर्ता भएका छन्। ती संशोधनका विषयमा सहमति जुटेपछि मात्र विधेयकलाई पारित प्रक्रियामा लैजाने तयारी गरिएको छ।
निर्वाचनसँग सम्बन्धित यी दुई विधेयकलाई आगामी निर्वाचन व्यवस्थापन र मतदाता अभिलेखीकरणसँग जोडेर हेरिएकाले संसद्मा चासोका साथ हेरिएको छ। अब दलहरूबीचको छलफलबाट निस्कने निष्कर्षपछि राष्ट्रिय सभाको अर्को बैठकमा विधेयकमाथिको प्रक्रिया अघि बढ्ने अपेक्षा गरिएको छ।