काठमाडौं । चिकित्सा शिक्षा आयोगको उपाध्यक्षको जिम्मेवारी डा. श्रीकृष्ण गिरीले पाएका छन्। प्रधानमन्त्री तथा आयोगका अध्यक्ष बालेन्द्र शाहले सोमबार उनलाई उक्त जिम्मेवारी दिएका हुन्।
जिम्मेवारी पाएपछि डा. गिरीले आफू आयोग पुगेको र अर्को व्यवस्था नभएसम्मका लागि उपाध्यक्षको जिम्मेवारी सम्हाल्ने बताएका छन्।
यसअघि सरकारले सार्वजनिक पदाधिकारीको पदमुक्तिसम्बन्धी विशेष व्यवस्था गर्न अध्यादेश ल्याएपछि आयोगका तत्कालीन उपाध्यक्ष अञ्जनी कुमार झा लगायत पदाधिकारी पदमुक्त भएका थिए। त्यसपछि आयोगको उपाध्यक्ष पद रिक्त रहेको थियो।
डा. गिरी आयोगका पूर्वउपाध्यक्ष समेत हुन्। आयोग स्थापना भएपछि पहिलो उपाध्यक्ष बनेका उनले आफ्नो चारवर्षे कार्यकाल पूरा गरेका थिए। उनको पुनः जिम्मेवारीमा आगमनलाई चिकित्सा शिक्षा क्षेत्रको अनुभव र निरन्तरतासँग जोडेर हेरिएको छ।
