काठमाडौं – नेपाली कांग्रेसले संसदीय दलको नेता चयनका लागि तय गरिएको निर्वाचन प्रक्रिया स्थगित गरेको छ। यसअघि आजै निर्वाचनमार्फत नेता चयन गर्ने कार्यतालिका सार्वजनिक गरिएको थियो।पार्टीभित्र सहमतिमै नेतृत्व चयन गर्ने उद्देश्यले निर्वाचन रोकिएको सहमहामन्त्री प्रकाश रसाइलीले जानकारी दिएका छन्।
उनका अनुसार कार्यसम्पादन समितिको बैठकले उपसभापति विश्वप्रकाश शर्माको संयोजकत्वमा वार्ता समिति गठन गरेको छ। समितिमा पुष्पा भुसाल, प्रदीप पौडेल, गुरुराज घिमिरे लगायत सदस्य छन्।
दलको नेता चयनका लागि भोलिसम्म सहमति जुटाउने लक्ष्य राखिएको छ। सभापति गगन थापाले सर्वसम्मत नेतृत्व चयनका लागि पहल गरिरहेका छन्।
हाल दलको नेतामा अर्जुननरसिंह केसी र भीष्मराज आङ्देम्बे मुख्य दाबेदारका रूपमा देखिएका छन् भने अन्य केही नेताको नाम पनि चर्चामा छ। प्रतिनिधिसभामा कांग्रेसका ३८ सांसद रहेका छन्।
