काठमाडौं – प्रधानमन्त्री बालेन्द्र शाहले नदी किनारका सुकुम्बासीलाई जोखिमपूर्ण अवस्थामा बस्न नदिने स्पष्ट सन्देश दिएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले हरेक वर्ष बाढीका कारण हजारौँ नागरिकले ज्यान जोगाउँदै घर छोड्नुपर्ने अवस्था दोहोरिँदै आएको स्मरण गराएका छन्। “अब पनि ठूला दुर्घटना कुर्दै बस्ने कि सुरक्षित व्यवस्थापन गर्ने?” भन्ने प्रश्न उठाउँदै उनले दीर्घकालीन समाधानतर्फ सरकार अघि बढेको बताएका छन्।
उनले सुकुम्बासीलाई त्यही जोखिमयुक्त ठाउँमा बस्न बाध्य पार्नु उनीहरूको अधिकार नभएको स्पष्ट पार्दै सुरक्षित स्थानमा व्यवस्थापन गर्नु नै वास्तविक अधिकार भएको उल्लेख गरेका छन्। साथै नदी किनारका बस्तीका कारण ढल निकास प्रणाली अवरुद्ध हुँदा उपत्यकामा फोहोर र दुर्गन्ध बढेको पनि बताएका छन्।
प्रधानमन्त्री शाहले थापाथली, गैरीगाउँ, मनोहरा लगायत क्षेत्रका बस्तीहरूलाई बल प्रयोग नगरी, मानवीय तरिकाले सुरक्षित स्थानमा स्थानान्तरण गरिने बताएका छन्। “हामीले गरेका वाचा बिर्सेका छैनौँ,” भन्दै उनले सुकुम्बासी व्यवस्थापन र सरकारी जग्गा अतिक्रमण नियन्त्रण गर्ने प्रतिबद्धता दोहोर्याएका छन्।
उनका अनुसार सरकार वास्तविक सुकुम्बासी र अतिक्रमणकारी छुट्याउने प्रक्रियामा छ। देशभर रहेका वास्तविक भूमिहीनलाई कानुनी प्रक्रिया पूरा गरी छिट्टै जग्गा वितरण गर्ने तयारी भइरहेको उनले बताएका छन्।
प्रधानमन्त्री शाहले वर्षौँदेखिको समस्या अब समाधान गर्ने दाबी गर्दै नागरिकलाई ढुक्क रहन आग्रह गरेका छन्।
