Photo: Naresh Shrestha/ THT विराटनगर – नेपाली कांग्रेसले कोशी प्रदेश स्तरको निर्वाचन समीक्षा कार्यक्रम आज विराटनगरमा आयोजना गर्दैछ।
पार्टीको सङ्गठनलाई थप सुदृढ बनाउने, हालैका निर्वाचनको परिणामको विश्लेषण गर्ने र आगामी राजनीतिक दिशा तय गर्ने उद्देश्यले कार्यक्रम तय गरिएको हो।
कार्यक्रममा पार्टीका केन्द्रीय सभापति गगन कुमार थापा ले सम्बोधन गर्नेछन्। यसका लागि सभापति थापा आज विराटनगर पुग्ने कार्यक्रम छ।
समीक्षा कार्यक्रममा कोशी प्रदेशका केन्द्रीय पदाधिकारी, केन्द्रीय सदस्य, प्रदेश कार्यसमिति, सङ्घीय तथा प्रदेश सांसददेखि जिल्ला र क्षेत्रीय तहका सभापतिहरूको उल्लेख्य सहभागिता रहनेछ। साथै अघिल्लो निर्वाचनमा प्रत्यक्ष र समानुपातिकतर्फ उम्मेदवार बनेकाहरू पनि सहभागी हुनेछन्।
यसअघि नेपाली कांग्रेस ले गण्डकी प्रदेश, लुम्बिनी प्रदेश, बागमती प्रदेश र मधेश प्रदेश मा यस्तै कार्यक्रम सम्पन्न गरिसकेको छ भने आज कोशीमा पनि समीक्षा प्रक्रिया अघि बढाइएको हो।
पार्टी नेतृत्वले यस कार्यक्रममार्फत स्थानीय तहदेखि प्रदेश तहसम्मको सङ्गठनको अवस्था, चुनावी नतिजा, कमजोरी र सुधारका सम्भावनाबारे प्रत्यक्ष सुझाव संकलन गर्ने लक्ष्य राखेको छ। साथै आगामी रणनीति, सङ्गठन विस्तार, क्रियाशील सदस्यता वृद्धि र १५औँ महाधिवेशनको तयारीजस्ता विषयमा समेत गहन छलफल हुने बताइएको छ।
कांग्रेसका सहमहामन्त्री डिला संग्रौलाका अनुसार कोशी प्रदेशको नेतृत्व व्यवस्थापन र सङ्गठन सुदृढीकरणका मुद्दा बैठकका मुख्य एजेन्डा रहनेछन्।
पार्टीले यस्ता समीक्षा कार्यक्रमलाई केवल हार–जीतको मूल्याङ्कनमा सीमित नराखी, व्यापक रूपमा सङ्गठन पुनर्जीवन अभियानका रूपमा अघि बढाएको जनाएको छ।
