यसअघि बजारमा आएको गिरावटपछि अर्थमन्त्री स्वर्णिम वाग्ले ले स्टक ब्रोकर एसोसिएसन अफ नेपाल तथा आर्थिक पत्रकारहरूसँग भेट गर्दै बजारमा अनावश्यक त्रास फैलिएको बताएका थिए। उनले आगामी बजेट रूपान्तरणकारी हुने र बजारको पारदर्शिता तथा सुधारका लागि सरकार प्रतिबद्ध रहेको आश्वासन दिएका थिए।
अर्थमन्त्रीको यही सकारात्मक संकेतले पनि बजारमा सुधार आउन मद्दत पुगेको विश्लेषण गरिएको छ। यद्यपि, कारोबार रकम भने केही घटेको छ। अघिल्लो दिन १२ अर्ब ३८ करोड रुपैयाँ बराबरको कारोबार भएकोमा आज १० अर्ब ९२ करोडमा सीमित रह्यो।
आज २६४ कम्पनीको शेयर मूल्य बढ्दा ४ कम्पनीको घटेको छ भने १ कम्पनीको स्थिर रह्यो। सबै समूहका सूचकहरू हरियाली देखिए, जसमा हाइड्रोपावर समूह सबैभन्दा धेरै ४.५९ प्रतिशतले बढ्यो। त्यस्तै फाइनान्स ४.०३, विकास बैंक ३.६३, बैंकिङ ३.१८, होटल तथा पर्यटन ३.२४, लगानी ३.३३, जीवन बीमा २.६६, माइक्रोफाइनान्स २.४३, निर्जीवन बीमा २.९४, उत्पादन तथा प्रशोधन १.५३, अन्य २.३६ तथा व्यापार २.४० प्रतिशतले वृद्धि भएका छन्।
आज ८ कम्पनीको शेयर मूल्य १० प्रतिशतले बढेको छ। उल्लेखनीय रूपमा उपकार लघुवित्त, रिडी पावर, नेसनल हाइड्रोपावर, भुजुङ हाइड्रोपावर, सुपरखुदी हाइड्रोपावर, रिजलाइन इनर्जी, सूर्यकुण्ड हाइड्रो इलेक्ट्रिक र होटल फरेस्ट इनका लगानीकर्ताले उच्च लाभ पाएका छन्।
अघिल्लो दिन १० प्रतिशतले बढेको रिलायन्स स्पिनिङ मिल्समा भने आज बिक्री चाप देखिँदा १.६० प्रतिशतले मूल्य घटेको छ। आज सबैभन्दा बढी कारोबार भएका कम्पनीहरूमा रिलायन्स स्पिनिङ मिल्स, हिमालयन रिइन्स्योरेन्स, एनआरएन इन्फ्रास्ट्रक्चर, अपी पावर र रिडी पावर रहेका छन्।
