काठमाडौं – स्पेनिस ला लिगाअन्तर्गत मड्रिड डर्बीमा रियल मड्रिडले एट्लेटिको मड्रिड माथि ३–२ को रोमाञ्चक जित निकालेको छ।गएराति सान्टियागो बर्नाबेउमा भएको खेलमा रियलको जितमा भिनिसियस जुनियर ले दुई गोल गर्दा फेडेरिको भालभर्डे ले एक गोल गरे।
एट्लेटिकोका लागि एडेमोला लूकमन र नाहुल मोलिनाले एक–एक गोल गरे।पहिलो हाफको ३३औं मिनेटमा लूकमनले गोल गर्दै एट्लेटिकोलाई अग्रता दिलाएका थिए। दोस्रो हाफमा रियल खेलमा फर्कियो, जहाँ भिनिसियसले ५२औं मिनेटमा पेनाल्टीमार्फत बराबरी गोल गरे।
५५औं मिनेटमा भालभर्डेले गोल गर्दै रियललाई २–१ ले अघि बढाए। तर ६६औं मिनेटमा मोलिनाले उत्कृष्ट गोल गर्दै खेल २–२ मा ल्याए। ७२औं मिनेटमा ट्रेन्ट एलेक्जेन्डर आर्नोल्डको पासमा भिनिसियसले व्यक्तिगत दोस्रो गोल गर्दै रियललाई निर्णायक अग्रता दिलाए। ७७औं मिनेटमा भालभर्डेले रातो कार्ड पाएपछि रियल दबाबमा परेको थियो, तर अन्तिम समयसम्म एट्लेटिकोले बराबरी गर्न सकेन।
यस जितसँगै रियलले २०२२ पछि पहिलोपटक एट्लेटिकोविरुद्ध ला लिगामा जित निकालेको छ। अंक तालिकामा दोस्रो स्थानमा रहेको रियलले शीर्षस्थानको बार्सिलोना सँगको दूरी ४ अंकमा झारेको छ।
बार्सिलोनाको २९ खेलबाट ७३ अंक रहेको छ भने रियलको ६९ अंक पुगेको छ। एट्लेटिको ५७ अंकसहित चौथो स्थानमा कायम रहेको छ।
