म्याग्दी — म्याग्दीबाट स्वतन्त्र उम्मेदवारी दिएर प्रतिनिधि सभा सदस्यमा निर्वाचित भएका महावीर पुनले आफ्नो चुनावी खर्च विवरण बुझाएका छन्।
पुनले बिहीबार जिल्ला निर्वाचन कार्यालय म्याग्दीमा चुनावी खर्च विवरण पेस गरेका हुन्। निर्वाचन आयोगमा बुझाइएको विवरणअनुसार उनले निर्वाचनमा कुल २८ लाख ६८ हजार ८६८ रुपैयाँ खर्च गरेका छन्।
विवरणअनुसार मनोनयन दर्तामा १० हजार, मतदाता नामावली खरिदमा ३ हजार, प्रचारप्रसार सामग्री खरिदमा २ लाख ९० हजार ५७५, यातायात तथा मर्मत खर्चमा ६ लाख ६० हजार ९९८, चालक ज्यालामा १ लाख ४० हजार रुपैयाँ खर्च भएको उल्लेख छ।
त्यस्तै होटल बास तथा खाना खर्चमा १३ लाख ७ हजार ६१९, डिजेल खर्चमा ३ लाख ६० हजार ४९९, स्टेशनरीमा २५ हजार ३०० र विविध शीर्षकमा ७० हजार ८७७ रुपैयाँ खर्च भएको विवरणमा उल्लेख गरिएको छ।
हालै सम्पन्न प्रतिनिधि सभा निर्वाचनमा पुन १४ हजार ९३१ मतान्तरले विजयी भएका थिए। उनले २२ हजार ८५० मत प्राप्त गर्दा नेकपा एमालेका उम्मेदवार हरिकृष्ण श्रेष्ठले ७ हजार ९१२ मत प्राप्त गरेका थिए।
निर्वाचन सम्पन्न भएको ३५ दिनभित्र उम्मेदवारहरूले आफ्नो चुनावी खर्च विवरण निर्वाचन आयोगमा बुझाउनुपर्ने कानुनी व्यवस्था रहेको छ।
