काठमाडौं — हर्क साम्पाङ ले समानुपातिक सिटको विषयलाई लिएर असन्तुष्टि जनाउने नेता तथा कार्यकर्तालाई पार्टीबाटै निष्कासन गर्ने चेतावनी दिएका छन्।
श्रम संस्कृति पार्टी का अध्यक्ष साम्पाङले बिहीबार सामाजिक सञ्जालमार्फत असन्तुष्ट पक्षलाई लक्षित गर्दै यस्तो चेतावनी दिएका हुन्। समानुपातिक सिटको विषयमा भइरहेको आलोचना सीमा नाघेको भन्दै उनले अब कारबाहीको कदम चाल्ने संकेत दिएका छन्।
साम्पाङले लेखेका छन्, “अब उप्रान्त समानुपातिकको विषयमा रोइलो गर्ने जति सबैलाई साधारण सदस्य समेत नरहने गरी पार्टीबाट निष्कासन गर्नेछु। हद भयो।”
निर्वाचन आयोग ले फागुन २८ गते सार्वजनिक गरेको प्रतिनिधि सभा सदस्यको समानुपातिकतर्फको अन्तिम नतिजाअनुसार श्रम संस्कृति पार्टीले ४ सिट प्राप्त गरेको छ।
सिट संख्या कम भए पनि आकांक्षी धेरै भएकाले पार्टीभित्र समानुपातिक सांसद छनोटको विषयलाई लिएर आन्तरिक किचलो बढेको देखिएको छ। यसै सन्दर्भमा अध्यक्ष साम्पाङले सार्वजनिक रूपमा असन्तुष्टि व्यक्त गर्नेहरूलाई साधारण सदस्यसमेत नरहने गरी पार्टीबाट हटाउने चेतावनी दिएका हुन्।
