नेपाली कांग्रेसले आगामी २१ फागुनमा हुने प्रतिनिधि सभाको निर्वाचनको प्रचार–प्रसारका लागि पहिलो पटक चुनावी आमसभा मधेस प्रदेशको राजधानी जनकपुरधामबाट सुरु गर्ने भएको छ।
कांग्रेसले ६ फागुनमा जनकपुरधामस्थित तिरहुतिया गाछीमा पहिलो चुनावी आमसभा आयोजना गर्न लागेको हो। मधेस प्रदेश कार्यसम्पादन समितिको बैठकले उक्त आमसभाको मञ्च व्यवस्थापनको जिम्मेवारी योगेन्द्र पजियारलाई तथा प्रचार–प्रसारको जिम्मेवारी सञ्चार विभाग मधेस प्रदेश प्रमुख नितेश कुमार गुप्तालाई दिएको छ।
त्यसैगरी, आमसभाको समग्र तयारी, व्यवस्थापन तथा संगठनात्मक विषयमा व्यापक छलफल गर्दै सभालाई प्रभावकारी र सफल बनाउन मधेस प्रदेशका सबै ३२ निर्वाचन क्षेत्रबाट लाखौँ सहभागी बोलाउने निर्णय गरिएको छ।
उक्त आमसभामा नेपाली कांग्रेसका सभापति गगन कुमार थापा प्रमुख अतिथिका रूपमा सहभागी हुनेछन् भने पार्टी केन्द्रका पदाधिकारीहरूको समेत उपस्थिति रहने नेपाली कांग्रेस मधेस प्रदेश प्रचारप्रसार विभाग प्रमुख नितेश कुमार गुप्ताले जानकारी दिए।
