राष्ट्रको नाममा सम्बोधन गर्नुहुँदै प्रम कार्की
काठमाडौँ, ९ असोजः अन्तरिम सरकारकी प्रधानमन्त्री सुशीला कार्कीद्वारा बिहीबार सिंहदरबारमा पहिलोपटक राष्ट्रको नाममा सम्बोधन गर्नुहुँदै । तस्बिरः प्रदीपराज वन्त÷रासस काठमाडौं– प्रधानमन्त्री सुशीला कार्कीले आसन्न प्रतिनिधिसभा निर्वाचन तोकिएकै मितिमा एकै चरणमा हुने स्पष्ट पारेकी छन्। बिहीबार भक्तपुरस्थित जनक शिक्षा सामग्री केन्द्र लिमिटेड पुगेर मतपत्र छपाइको प्रगतिबारे जानकारी लिएपछि सञ्चारकर्मीसँग कुरा गर्दै प्रधानमन्त्री कार्कीले फागुन २१ गते देशभर एकै चरणमा निर्वाचन हुने ठोकुवा गरेकी हुन्।
तोकिएको मितिमा निर्वाचन सम्पन्न भई मत परिणाम आएपछि आफ्नो जिम्मेवारी पूरा गरेर घर फर्किने उनले बताइन्। ‘निर्वाचन सम्पन्न गराउनु मेरो दायित्व हो, त्यो पूरा गरेर म घर फर्किन्छु,’ उनले भनिन्।
प्रधानमन्त्री कार्कीले फागुन २१ गते देशभर मौसम पनि अनुकूल हुने विश्वास व्यक्त गरिन्। मतपत्र छपाइको काम अवलोकन गर्दा आफू निकै उत्साहित भएको उल्लेख गर्दै उनले निर्वाचनको सम्पूर्ण तयारी पूरा भइसकेको र अब जनताले मतपत्रमा छाप लगाउन मात्रै बाँकी रहेको बताइन्।
यसैबीच गृहमन्त्री ओमप्रकाश अर्यालले तोकिएको मितिमा हर हालतमा निर्वाचन हुने स्पष्ट पारे। उनले निर्वाचनका लागि सबै तयारी सकारात्मक ढंगले अघि बढेको र कुनै पनि किसिमको सुरक्षा चुनौती नरहेको दाबी गरे।
त्यस्तै निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले निर्वाचनको तयारी तीव्र गतिमा भइरहेको जानकारी दिए। निर्वाचन आचारसंहिता उल्लंघनमा कडाइ गरिएको उल्लेख गर्दै उनले सरकार र आयोग दुवै तोकिएको समयमा निर्वाचन गराउन दृढ रहेको बताए।
आगामी फागुन २१ गते हुने प्रतिनिधिसभा सदस्य निर्वाचनका लागि प्रत्यक्षतर्फ ६० निर्वाचन क्षेत्रको मतपत्र छपाइ सम्पन्न भइसकेको निर्वाचन आयोगले जनाएको छ। हालसम्म ६० निर्वाचन क्षेत्रका लागि ७२ लाख ६० हजार मतपत्र छपाइ सकिएको आयोगको जानकारी छ। समानुपातिकतर्फका मतपत्र ढुवानीका लागि समेत तयारी अवस्थामा राखिएको आयोगले जनाएको छ।
