काठमाडौं । आईसीसी पुरुष टी–२० विश्वकप २०२६ नेपाली भाषामा कमेन्ट्रीसहित प्रसारण हुने भएको छ ।
अन्तर्राष्ट्रिय क्रिकेट परिषद् (आईसीसी) ले सार्वजनिक गरेको प्रसारण विवरणअनुसार प्रतियोगिताका केही खेल—विशेषगरी नेपाल सहभागी हुने खेल—कान्तिपुर टेलिभिजनले स्थानीय उत्पादनसहित नेपाली भाषामा प्रसारण गर्नेछ । नेपाली कमेन्ट्री फिड आईसीसी डट टिभीमार्फत विश्वभर रहेका नेपाली भाषी दर्शकका लागि पनि उपलब्ध गराइने जनाइएको छ ।
भारत र श्रीलंकाको संयुक्त आयोजनामा फेब्रुअरी ७ देखि मार्च ८ सम्म हुने प्रतियोगितामा २० टोली सहभागी हुनेछन् । प्रतियोगिताअन्तर्गत कुल ५५ खेल खेलाइनेछन् ।
विश्वभरका दर्शकले खेलहरू टेलिभिजन, डिजिटल प्लेटफर्म, अडियो तथा अन्य नयाँ माध्यममार्फत प्रत्यक्ष हेर्न सक्नेछन् ।
दक्षिण एसियामा जियोस्टारले स्टार स्पोर्ट्स नेटवर्कमार्फत टेलिभिजन प्रसारण गर्नेछ भने जियोहटस्टार डिजिटल प्लेटफर्मबाट पनि खेलहरू उपलब्ध हुनेछन् ।
स्टार स्पोर्ट्स नेपाल, श्रीलंका, बंगलादेश, भुटान र माल्दिभ्समा वितरण साझेदारमार्फत उपलब्ध हुने जनाएको छ ।
