नेकपा एमालेका अध्यक्ष केपी शर्मा ओलीले निर्वाचन दुई चरणमा गर्ने प्रस्ताव कुनै हालतमा पनि स्वीकार्य नहुने स्पष्ट पारेका छन्।
पार्टीको झापा–काठमाडौं सम्पर्क मञ्चले आयोजना गरेको भेटघाट कार्यक्रमलाई सम्बोधन गर्दै अध्यक्ष ओलीले प्रधानमन्त्री शुशीला कार्कीलाई प्रश्न गर्दै यस्तो बताएका हुन्। उनले भने, “प्रधानमन्त्रीले हिमालमा हिउँ परेमा निर्वाचन दुई चरणमा हुन्छ भन्ने कुरा गरेको सुनेँ। यो कुनै हालतमा पनि स्वीकार्य हुँदैन।”
प्रधानमन्त्रीले हिमाली जिल्लामा हिउँ परेपछि निर्वाचन स्थगित हुन सक्ने अभिव्यक्ति दिएको प्रसंग उठाउँदै अध्यक्ष ओलीले निर्वाचनको मिति तोक्ने बेलामै मौसम र भौगोलिक अवस्थाको पूर्वानुमान किन नगरिएको भन्दै प्रश्न गरे।
“पोहोर हिउँदभन्दा अघि जन्मेको बच्चालाई पनि हिउँदमा हिउँ पर्छ भन्ने थाहा हुन्छ,” ओलीले भने, “अनि निर्वाचनको मिति तोक्ने बेलामा हिउँदमा चिसोका कारण निर्वाचन हुन नसक्ने कुरा थाहा थिएन?”
अध्यक्ष ओलीले निर्वाचन शतप्रतिशत निष्पक्ष, स्वच्छ र धाँधलीरहित हुनुपर्नेमा जोड दिए। “निर्वाचनको तयारी निष्पक्ष हुनुपर्छ। मतदान बिना डर, त्रास र प्रलोभन सम्पन्न हुनुपर्दछ,” उनले भने, “मतपेटिका एक सेकेन्ड पनि पार्टीका प्रतिनिधिको निगरानीबाहिर जानु हुँदैन। यसमा सबै चनाखो हुन आवश्यक छ।”
