काठमाडौं– नेकपा एमालेका उपाध्यक्ष पृथ्वी सुब्बा गुरुङले जनताले नयाँ अनुहारभन्दा पनि नयाँ भिजन खोजिरहेको बताएका छन्।
प्रेस चौतारी नेपालले मंगलबार काठमाडौंमा आयोजना गरेको निर्वाचन संवाद कार्यक्रममा बोल्दै उपाध्यक्ष गुरुङले राजनीतिक दलहरूमा अनुहार फेरिए पनि सोच, सिद्धान्त र दृष्टिकोण नफेरिएसम्म त्यसलाई नयाँ भन्न नसकिने धारणा राखे।
नेपाली कांग्रेसलाई लक्षित गर्दै उनले नयाँ भयो भन्ने प्रचार गरिए पनि व्यवहारमा त्यस्तो नदेखिएको बताए। “कांग्रेसमा नयाँ अनुहार आए, तर नयाँ भिजन आएन,” गुरुङले भने, “दोस्रो विशेष महाधिवेशनपछि पनि उनीहरूको सिद्धान्त, विचार र दर्शनमा कुनै परिवर्तन देखिँदैन। त्यसैले कांग्रेस यथास्थितिमै छ।”
नयाँ दलहरूको उदयलाई चुनौतीको रूपमा स्वीकार्दै उनले लामो इतिहास बोकेका पार्टीहरूको सान्दर्भिकता सकिन नसक्ने दाबी गरे। “केही पार्टी र व्यक्तिले आफूलाई नयाँ र अरूलाई पुरानो भनेर आरोप लगाइरहेका छन्,” उनले भने, “तर उनीहरू एजेन्डाविहीन छन्, त्यसैले जनतामाझ ‘पब्लिक फेस’ बनाउन सकेका छैनन्।”
आगामी फागुन २१ गते हुने प्रतिनिधिसभा निर्वाचनका सन्दर्भमा सम्भावित राजनीतिक तालमेलबारे बोल्दै गुरुङले हाल तत्कालीन अवस्था नदेखिए पनि भविष्यमा सम्भावना भने बाँकी रहेको बताए।
