पोखरा – १९ वर्षमुनिको साफ महिला च्याम्पियनसिप फुटबल प्रतियोगिताअन्तर्गत आज दुई खेल हुँदैछन्। पोखरा रंगशालामा मध्याह्न १२ बजे हुने पहिलो खेलमा बंगलादेश र भारतबीच प्रतिस्पर्धा हुनेछ।
त्यसैगरी घरेलु टोली नेपालले दिउँसो ३ बजे भूटानसँग प्रतिस्पर्धा गर्नेछ। नेपाल र भूटान दुवै टोली यसअघि आफ्नो पहिलो खेलमा पराजित भएका छन्। नेपाल भारतसँग १–० गोलले पराजित भएको थियो भने प्रतियोगिताको उद्घाटन खेलमा भूटान बंगलादेशसँग १२–० को फराकिलो अन्तरले पराजित भएको थियो।
यस कारण आजको खेल नेपाल र भूटान दुवैका लागि अत्यन्त महत्वपूर्ण रहेको छ। फाइनल सम्भावना जीवित राख्न दुवै टोलीलाई जित अनिवार्य हुनेछ।
बंगलादेश र भारतले भने एक–एक खेल जित्दै समान तीन अङ्क जोडिसकेका छन्। प्रतियोगितामा यसपटक चार टोलीको सहभागिता रहेको छ।
दक्षिण एसियाली फुटबल महासङ्घ (साफ)को समन्वय तथा अखिल नेपाल फुटबल सङ्घ (एन्फा)को आयोजनामा भइरहेको प्रतियोगिता ‘राउन्ड रोबिन लिग’ प्रणालीमा सञ्चालन भइरहेको छ, जहाँ प्रत्येक टोलीले एक–अर्कासँग एक–एक खेल खेल्नेछन्।
लिग चरणपछि शीर्ष दुई टोलीले माघ २४ गते हुने फाइनल खेलमा उपाधिका लागि प्रतिस्पर्धा गर्नेछन्।
