भारतीय गायक अरिजित सिंहले चलचित्र गायन (प्लेब्याक सिङ्गिङ) बाट सन्यास लिने घोषणा गरेका छन्। मंगलबार साँझ सामाजिक सञ्जालमार्फत नयाँ वर्ष २०२६ को शुभकामना दिँदै उनले अबदेखि प्लेब्याक गायकका रूपमा कुनै नयाँ काम नगर्ने बताएका हुन्।
उनले लेखेका छन्, “यो यात्रामा मलाई साथ, माया र समर्थन दिनु हुने सबैलाई धन्यवाद। म अबदेखि प्लेब्याक गायकका रूपमा कुनै नयाँ काम लिने छैन। यो यात्रालाई यहीँ समाप्त गर्दैछु। यो एक सुन्दर अनुभव रह्यो।”
अरिजित सिंहको यस घोषणापछि बलिउड क्षेत्र र उनका प्रशंसकहरू स्तब्ध भएका छन्। धेरैले उनको सांगीतिक योगदानको प्रशंसा गर्दै आगामी यात्राका लागि शुभकामना व्यक्त गरेका छन्।
अरिजितले पछिल्लोपटक सलमान खान अभिनीत चलचित्र ‘ब्याटल अफ गलवान’ को गीत ‘मातृभूमि’ गाएका थिए। चलचित्र गायनबाट सन्यास लिए पनि उनले आफ्नो स्वतन्त्र सांगीतिक यात्रा भने निरन्तर जारी रहने स्पष्ट पारेका छन्।
उनका ‘तुम ही हो’, ‘जनम जनम’, ‘अपना बना ले’, ‘ओ माही’, ‘अगर तुम साथ हो’, ‘मस्त मगन’, ‘मुस्कुराने की वजह तुम हो’ लगायत थुप्रै गीत अत्यन्त चर्चित छन्। सिंहले दुई वर्षअघि काठमाडौंमा पनि सांगीतिक प्रस्तुति दिएका थिए।
