काठमाडौं – नेपाल स्टक एक्सचेञ्ज (नेप्से) परिसूचकसँगै कारोबार रकममा उल्लेख्य सुधार देखिएको छ। आज नेप्से परिसूचक ५७ दशमलव ५५ अङ्कले बढेर दुई हजार ७७२ दशमलव १७ बिन्दुमा पुगेको छ, जुन २ दशमलव १२ प्रतिशतको वृद्धि हो।
आजको कारोबारमा ३३१ कम्पनीका तीन करोड नौ लाख १५ हजार १८३ कित्ता शेयर एक लाख ३३ हजार ५२९ पटक खरिदबिक्री हुँदा कुल १३ अर्ब ७८ करोड ५७ लाख २९ हजार ६४५ रुपैयाँ बराबरको कारोबार भएको छ।
नेप्सेका अनुसार आज सबै समूहका उपसूचकहरूमा वृद्धि देखिएको छ। साथै, आठ वटा कम्पनीको शेयर मूल्यमा सकारात्मक सर्किट लागेको छ।
कारोबार रकम र कारोबार भएका शेयर संख्याका आधारमा आज सबैभन्दा बढी आँखुखोला जलविद्युत् कम्पनी लिमिटेडको कारोबार भएको छ। कम्पनीको १६ लाख ६८ हजार कित्ता शेयर किनबेच हुँदा कुल ४३ करोड ५९ लाख ३३ हजार १६२ रुपैयाँ बराबरको कारोबार भएको नेप्सेले जनाएको छ।
