विराटनगर । कोशी प्रदेशसभामा राष्ट्रिय प्रजातन्त्र पार्टी (राप्रपा) की सांसद सविना बजगाईंले प्रयोग गरेको ‘राजा’ शब्दलाई रेकर्डबाट हटाइएको छ ।
प्रदेशसभाको आइतबार बसेको बैठकको शून्य समयमा बोल्दै सांसद बजगाईँले देशमा धर्मनिरपेक्षता, संघीयता र गणतन्त्र डलर खाएर डलरे नेताहरूले राजाको विरोध गरेको बताएकी थिइन् ।
बजगाईंले ‘डलर खाएको’ भन्दै बोलेको विषयमा एमाले प्रमुख सचेतक विदुरकुमार लिङ्थेपले नियमापत्ती जनाउँदै सो शब्द रेकर्डबाट हटाउन माग गरेका थिए ।
यसैगरी, नेकपा माओवादी केन्द्रका सांसद गोम्बु शेर्पाले ‘राजा’ शब्द हटाउन माग गरेका थिए ।
डलर खाएको पुष्टि गर्न सभामुखले बजगाईलाई फेरि समय दिए । त्यसक्रममा बजगाईंले फेरि भनिन्, ‘संघीयता, धर्मनिरपेक्ष र गणतन्त्र लाद्नका लागि विदेशबाट विभिन्न माध्यामबाट डलर भित्रिएको कुरा अहिले अमेरिकाका राष्ट्रपतिबाट पनि सार्वजनिक भएको छ । सदनमार्फत पनि यो कुरा आइरहेको अवस्थामा यो कुरा तथ्यमा टेकेरै हामीले डलरवादी भनेका हौं । यो गणतन्त्र यहि सदनबाट खारेजको माग गर्न चाहन्छु ।’
समय नदिँदै फेरि लिङ्थेपले ‘सभामुखले नै दोहोरी गराउने कोसिस गरेको भन्दै यहि व्यवस्थामा बसेर सदनभित्र नै व्यवस्था खारेजीको माग गर्न पाइने कि नपाइने भन्ने प्रश्न गरेका थिए ।
केहीबेरको दोहोरीपछि सभामुख अम्बरबहादुर विष्टले ‘राजा’ र ‘डलर खाएको’ विषय रेकर्डबाट हटाउन सचिवालयलाई निर्देशन दिएका थिए ।
राप्रपाबाटै सांसदमा निर्वाचित भएका सभामुख विष्टले राजा शब्दलाई हटाउन निर्देशन दिएपछि राप्रपाका सांसदबाहेक प्रदेशसभाका सबै सांसदले टेबल ठोकेर समर्थन जनाएका थिए ।
