विराटनगर । कोशी प्रदेशका आन्तरिक मामिला तथा कानुनमन्त्री लिलाबल्लभ अधिकारीले पदबाट राजीनामा दिने भएका छन् ।
सुटुक्क जापान पुगेर फर्किएका अधिकारीलाई लिएर विवाद भएपछि उनले पदबाट बुधबार नै राजीनामा दिने तयारी गरेका हुन् ।
मन्त्री अधिकारी बिना अनुमति र बिना जानकारी जापान गएको विषयमा विवाद भएको थियो । त्यही विवादका कारण अधिकारी पद गुमाउने अवस्था आएको हो ।
मन्त्रालयमै केहीबेरमा पत्रकार सम्मेलनको आयोजना गरेर उनले पदबाट राजीनामा दिएको घोषणा गर्ने छन् ।
मन्त्रीहरूले विदेश भ्रमणमा जाँदा प्रधानमन्त्री तथा मन्त्रिपरिषद्को कार्यालयमार्फत परराष्ट्र मन्त्रालयको सहमति लिनुपर्ने र विदेश भ्रमणको सहमतिका लागि परराष्ट्र मन्त्रालयमा लेखिपठाउँदा प्रदेश मन्त्रिपरिषद्को निर्णयसहित पठाउनुपर्ने व्यवस्था छ ।
तर, मन्त्रिपरिषद्को निर्णय बिना नै जापान पुगेर फर्किएको भनेर मन्त्री अधिकारीको आलोचना भइरहेको छ ।
जापानमा हुने एक कार्यक्रममा सहभागी हुन भन्दै अधिकारी गत कात्तिक १३ गते त्यसतर्फ प्रस्थान गरेका थिए ।
उनी टोकियो महानगरले आयोजनामा भएको कार्यक्रममा जापान गएको बताइन्छ ।
नेकपा (एमाले) प्रदेश संसदीय दलका नेता हिक्मतकुमार कार्की नेतृत्वको कोशी प्रदेश सरकारमा अधिकारी एमालेबाटै मन्त्री बनेका थिए ।
