विराटनगर । पुरुष फुटबल होस् वा महिला फुटबलमा, नेपाल र भारतको प्रतिस्पर्धा सधैँ चर्चाको शिखरमा हुने गरेको छ ।
यी दुईको प्रतिस्पर्धामा नतिजामात्रै होइन, गोल र प्रदर्शनले पनि ठुलै प्रभाव पार्ने छ ।
दक्षिण एसियाली महिला फुटबलमा भारतको प्रभुत्व रहेको छ र उसलाई पछ्याउने, उछिन्ने प्रयास नेपालले गरिरहेको छ ।
सन् २०१० देखि सुरु भएको महिला साफमा नेपाल सन् २०१६ को चौथो संस्करण बाहेक सबैमा फाइनल पुगेको थियो ।
जसमा साफको उपाधि लगातार पाँचपल्ट भारतले जित्दा चारपटक नेपाल उपविजेतामै सीमित बनेको थियो ।
त्यसैले महिला फुटबलमा पनि नेपाल र भारतको प्रतिस्पर्धा आकर्षक बन्ने गरेको छ ।
बंगलादेशमा भएको पहिलो संस्करणमा भारतले नेपाललाई १–० गोलले हराउँदै उपाधि जितेको थियो भने श्रीलंकामा भएको दोस्रो संस्करणमा भारतले नेपाललाई ३–१ गोलले हरायो ।
पाकिस्तानमा भएको तेस्रो संस्करणको उपाधि भिडन्तमा नेपालले भारतसँग ६–० गोलको लज्जास्पद हार बेहोरेको थियो ।
चौथो संस्करण भारतमा भएको थियो, जहाँ नेपाल सेमिफाइनलसम्म पनि पुग्न पाएन । त्यसबेला घरेलु टोलीले बंगलादेशलाई ३–१ गोलले हराउँदै उपाधि घरमै राख्यो ।
पाँचौं संस्करणयता महिला साफ नेपालमै हुँदै आइरहेको छ ।
सन् २०१९ मा भएको पाँचौं संस्करणमा आयोजक नेपाललाई ३–१ गोलले हराउँदै भारतले उपाधि छिन्यो ।
अघिल्लो संस्करणमा भने घरेलु टिम नेपाल बंगलादेशसँग ३–१ गोलले नै हार्यो ।
अब, यसपालि भने नेपालले उपाधि घरमै राख्ने योजना बनाएको छ ।
तर, अघिल्ला नतिजाहरूलाई आधार मानेर हेर्दा नेपालको उपाधि जित्ने योजना तब सार्थक हुनेछ, जब उसले भारतलाई हराउने छ ।
दक्षिण एसियाली महिला फुटबलको महाकुम्भ महिला साफ च्याम्पियनसिप आजदेखि दशरथ रंगशालामा सुरु हुँदै छ ।
आज हुने उद्घाटन खेलमा पाँच पटकको च्याम्पियन भारत र पाकिस्तानबिच प्रतिस्पर्धा हुनेछ ।
नेपालले भने शुक्रबार भुटानसँग खेल्दै च्याम्पियनसिपको सुरुवात गर्नेछ ।
भुटानसँगको खेलमा नेपाली टोलीकी प्रभावशाली स्ट्राइकर सावित्री भण्डारी ‘साम्बा’ को अनुपस्थिति नेपाली टोलीलाई खड्किनेछ ।
फ्रान्सको एन एभेन्ट गेङगाम्पबाट व्यावसायिक फुटबल खेल्दै आउनुभएकी साम्बालाई क्लबले फुकुवा गर्न नमानेपछि पहिलो खेल गुमाउनु परेको हो ।
यद्यपि उनी दोस्रो खेलपछि टोलीमा आबद्ध हुने प्रशिक्षक तामाङले बताए ।
कात्तिक १४ गतेसम्म सञ्चालन हुने च्याम्पियनसिपको समूह ‘ए’ मा साबिक विजेता बंगलादेश, भारत र पाकिस्तान रहेको छ ।
समूह ‘बी’ मा आयोजक नेपालसहित माल्दिभ्स, भुटान र श्रीलंका रहेका छन् ।
प्रतियोगिताको अनुमानित बजेट चार करोड ६० हजार आठ सय रुपैयाँ रहेको छ ।
नेपालमा लगातार तेस्रोपटक महिला साफ च्याम्पियनसिपको आयोजना हुँदै छ ।
नेपालले यसअघि सन् २०१९ मा विराटनगरमा र दुई वर्षअघि काठमाडौँमा महिला साफ आयोजना गरेको थियो ।
सन् २०१० देखि प्रत्येक दुई–दुई वर्षमा साफ च्याम्पियनसिप हुँदै आएको छ ।
