विराटनगर । थाइल्यान्डमा १४ वटा स्वर्ण पदक जितेर स्वदेश फर्किएका मोरङको विराटनगर महानगरपालिका-४ बरगाछीस्थित हेरिटेज इन्टरनेसनल स्कुलमा अध्ययनरत दुई विद्यार्थीलाई स्वागत गरिएको छ ।
मंगलबार विराटनगर विमानस्थलमा हेरिटेजको कक्षा २ मा पढ्ने कुनाल कामत र कक्षा ७ मा अध्यनरत गोविन्द गोयल अग्रवाललाई स्वागत गरिएको हो ।
थाइल्यान्डमा हालै सम्पन्न इन्डुर्यान्स इन्टरनेसनल च्याम्पियन्समा कुनालले ११ वटा स्वर्ण र तीन वटा कास्य जितेका थिए । आठ वर्षीय कुनाल प्लेयर अफ द इभेन्ट पनि बनेका थिए ।
यसैगरी, ११ वर्षीय गोविन्दले भने तीन स्वर्ण र तीनवटै कांस्य जितेका थिए । उनीहरू दुवैले उक्त प्रतियोगितामा नेपाललाई दोस्रो स्थान दिलाउन महत्त्वपूर्ण भूमिका निभाएका थिए ।
कुनाल र गोविन्दलाई स्वागत गर्दै स्कुलका प्रिन्सिपल सुशान्त बानियाँले आफ्ना विद्यार्थीले गरेको उत्कृष्ट प्रदर्शनबाट गौरभान्वित महसुस गरेको सुनाए ।
थाइल्यान्डमा पाँच दिने चल्ने उक्त प्रतियोगितामा १२ देशका खेलाडीहरू सहभागी भएका थिए ।
सो प्रतियोगितामा नेपालको प्रतिनिधित्व गर्न उनीहरू असोज पहिलो साता थाइल्यान्ड पुगेका थिए ।
कुनालले १० वर्षमुनिका खेलाडीहरूबीच प्रतिस्पर्धा गरेका थिए भने गोविन्दले अन्डर-१४ समूहमा खेलेका थिए ।
विराटनगरको उत्कृष्ट विद्यालयमध्येको एक हेरिटेजले पठनपाठनबाहेक खेलकुदलगायत अतिरिक्त क्रियाकलापहरूमा जोड दिँदै आएको छ ।
केही दिनअघि स्कुलले स्विमिङ प्रतियोगिताको आयोजना गरेको थियो ।
त्यसअघि भने हेरिटेजले कक्षा ४ देखि १० कक्षासम्मका विद्यार्थीहरूलाई महिनावारी, महिनावारीको समयमा हुने शारीरिक र भावनात्मक परिवर्तनहरू, महिनावारीको समयमा हुने गलत अभ्यासलगायत विषयमा सचेत गराएको थियो ।
