विराटनगर । फुटबलको सर्वोच्च निकाय फिफाको पछिल्लो वरीयतामा नेपाल एक स्थान तल झरेको छ । बिहीबार फिफाले सार्वजनिक गरेको वरीयताअनुसार नेपाल १७६औं स्थानमा पुगेको हो ।
गत महिनाको वरीयतामा नेपाल १७५औं स्थानमा थियो । २०७५ सालतिर १६०औं स्थानसम्म पुगेको नेपालको वरीयता पछिल्ला वर्षहरूमा झन्-झन् खस्कँदो छ ।
दक्षिण एसियाको शीर्ष स्थानमा रहेको भारत दुई स्थान तल झर्दै १२६औं स्थानमा पुगेको छ भने दोस्रो स्थानमा रहेको माल्दिभ्स १६३औं स्थानमा छ ।
त्यसैगरी दुई स्थान तल झर्दै भुटान १८४औं स्थानमा पुगेकोछ भने दुई स्थान तल झरेर बंगलादेश १८६औं स्थानमा पुगेको छ । पाकिस्तान १९७ औं स्थानमा र पाँच स्थान सुधार गर्दै श्रीलंका २०० औं स्थानमा छ ।
फिफा वरीयताको शीर्ष स्थानमा भने विश्वविजेता अर्जेन्टिनाले आफ्नो स्थान कायमै राखेको छ । दोस्रोमा फ्रान्स, तेस्रोमा स्पेन, चौथोमा इङल्यान्ड, पाँचौंमा ब्राजिल, छैटौंमा बेल्जियम, सातौंमा नेदरल्याण्डस, आठौंमा पोर्चुगल, नवौंमा कोलोम्बिया र १० औं स्थानमा इटाली रहेका छन् ।
