विराटनगर । स्थानीय तहमा रिक्त रहेको स्थानमा आगामी मंसिर १६ गते उपनिर्वाचन हुँदै छ ।
स्थानीय तह निर्वाचन ऐन, २०७३ बमोजिम रिक्त पदमा पदावधि एक वर्षभन्दा बढी रहेको अवस्थामा उपनिर्वाचन हुने व्यवस्था छ ।
सोहीअनुरूप सरकारले स्थानीय तहमा हाल रिक्त जिल्ला समन्वय समितिका दुई प्रमुखसहित ३९ जनप्रतिनिधिको बाँकी कार्यकालका लागि उपनिर्वाचन गर्न लागेको छ ।
कोशी प्रदेशका झापा, मोरङ, सुनसरी, तेह्रथुम, ओखलढुंगा र उदयपुरमा गाउँपालिका अध्यक्षसहित सात पद रिक्त रहेका छन् ।
मोरङको ग्रामथान गाउँपालिकामा अध्यक्ष जयप्रकाश गच्छदार थारूको निधन भएपछि उक्त पद रिक्त छ ।
गत वर्षको माघ १० गते राष्ट्रियसभा निर्वाचनका लागि छलफल गर्न विराटनगरस्थित होटल स्टर्न स्टारमा नेपाली कांग्रेसले आयोजना गरेको कार्यक्रममा सहभागी हुँदै गर्दा बेहोस् भएका थारूको उपचारका क्रममा गत असार ३ गते निधन भएको थियो ।
२०७९ वैशाख ३० गते भएको निर्वाचनमा विजयी भएका नेपाली कांग्रेसका गच्छदारको निधन भएयता उपाध्यक्ष गुणावतीदेवी थारूले कार्यवाहक अध्यक्षको भूमिका निर्वाह गर्दै आएकी छन् ।
उक्त पदका लागि १४ जना आकांक्षीहरू देखिएका छन् । जसअनुरूप नेकपा माओवादी केन्द्रले भने उम्मेदवारको छिनोफानो नै गरेको छ ।
माओवादीले अर्कै पार्टीबाट प्रवेश गरेकालाई ग्रामथान गाउँपालिका अध्यक्षको टिकट दिएको हो ।
केही समयअघि मात्रै नेपाली कांग्रेस छाडेर माओवादी प्रवेश गरेका नमोनारायण माझीलाई सोमबार पार्टीले उम्मेदवार बनाएको हो ।
ग्रामथान गाउँपालिकाको कार्यालय रहेको तेतरिया बजारमा सोमबार आयोजित कार्यक्रमबाट माझीलाई अध्यक्षको उम्मेदवार घोषणा गरिएको हो ।
उनी यसअघि २०७४ सालमा तत्कालीन फोरम लोकतान्त्रिकबाट उम्मेदवार बनेर उनी ग्रामथान गाउँपालिका–१ को वडाध्यक्ष निर्वाचित भएका थिए ।
गत २०७९ सालको निर्वाचनमा स्वतन्त्र रूपमा सोही वडाको अध्यक्षमा उम्मेदवार बनेका थिए । तर, तेस्रो भए ।
कांग्रेस छाडेर माओवादी रोजेपछि अहिले गाउँपालिका अध्यक्षकै उम्मेदवार बन्ने मौका पाएका हुन् ।
माझीको उम्मेदवारी घोषणा कार्यक्रममा माओवादीका नेताहरू सावित्रीकुमार काफ्ले, पूर्वमन्त्री अमनलाल मोदी, विजय विश्वासलगायतको उपस्थिति थियो ।
माओवादी उम्मेदवार घोषणा गरिसक्दा कांग्रेस, एमालेले भने उम्मेदवारबारे निर्णय गरिसकेका छैनन् । तर, आकांक्षीहरूको भने लाइन नै छ ।
आकांक्षीहरूमध्येका प्रबल दाबेदार मानिएका नेकपा एमालेका नेता शिवनारायण माझी भने गत महिना जुवाको खालबाट पक्राउ परेका थिए ।
ग्रामथान गाउँपालिका-४ कटहरास्थित जुवाको अखडामा छापा हानेर मोरङ ग्रामथान गाउँपालिकाका पूर्वअध्यक्षसमेत रहेका माझीलाई प्रहरीले पक्राउ गरेको थियो ।
माझी २०७४ को निर्वाचनमा निर्वाचित गाउँपलिका अध्यक्ष हुन् ।
उक्त निर्वाचनमा तत्कालीन लोकतान्त्रिक फोरमबाट उठेका जयप्रकाश गच्छदार थारूलाई ५९ मतको झिनो मतान्तरले हराउँदै माझी ग्रामथान गाउँपालिकाको संस्थापक अध्यक्ष बनेका थिए ।
तर, उनी २०७९ वैशाख २८ गतेको स्थानीय तहको निर्वाचनमा जयप्रकाश गच्छदार थारूसँग १५ सय भोटले हारेका थिए ।
जुवाखालबाट पक्राउ परेका उनलाई एमालेले अध्यक्षको टिकट दिने सम्भावना घटेको छ ।
उनको स्थानमा एमालेले अरू कसैलाई अगाडि सार्ने सम्भावना छ ।
एमालेबाट अरू पनि अध्यक्षको आकांक्षी छन् । नवीन मण्डल, ओमकुमार खाँ, कृष्णकुमार माझी पनि ग्रामथान गाउँपालिका अध्यक्षका आकांक्षी रहेको बताइन्छ ।
कांग्रेसबाट भने सत्यनारायण भगत, शेखर विश्वास, एकाराम माझी, बलराम सरदार, तुलसी विश्वास, सूर्यनारायण चौधरी र सबिताकुमारी चौधरी आकांक्षी देखिएका छन् ।
यता, तत्कालीन अध्यक्ष जयप्रकाश गच्छदार थारूका ‘पिए’ सुवास गच्छदारले अध्यक्षमा स्वतन्त्र उम्मेदवारी दिन लागेको बताइन्छ ।
ग्रामथानबाहेक कन्काई नगरपालिका–६ को वडाध्यक्षका लागि उपनिर्वाचन हुने भएको छ भने तेह्रथुमको लालीगुराँस नगरपालिका–८, सुनसरीको गढी गाउँपालिका–६ ओखलढुंगाको मोलुङ गाउपालिका–६, उदपयुरको त्रियुगा नगरपालिका–१२ र बेलका नगरपालिका–८ का वडाध्यक्षका लागि उपनिर्वाचन हुने छ ।
