विराटनगर । मोरङको ग्रामथान गाउँपालिकाको अध्यक्षका लागि आकांक्षीहरूको लर्को नै लागेको छ ।
अध्यक्ष जयप्रकाश गच्छदार थारूको निधन भएपछि रिक्त रहेको उक्त पदका लागि १४ जना आकांक्षीहरू देखिएका छन् ।
गत वर्षको माघ १० गते राष्ट्रियसभा निर्वाचनका लागि छलफल गर्न विराटनगरस्थित होटल स्टर्न स्टारमा नेपाली कांग्रेसले आयोजना गरेको कार्यक्रममा सहभागी हुँदै गर्दा बेहोस् भएका थारूको उपचारका क्रममा गत असार ३ गते निधन भएको थियो ।
२०७९ वैशाख ३० गते भएको निर्वाचनमा विजयी भएका नेपाली कांग्रेसका गच्छदारको निधन भएयता उपाध्यक्ष गुणावतीदेवी थारूले कार्यवाहक अध्यक्षको भूमिका निर्वाह गर्दै आएकी छन् ।
स्थानीय तह निर्वाचन ऐन, २०७३ बमोजिम रिक्त पदमा पदावधि एक वर्षभन्दा बढी रहेको अवस्थामा उपनिर्वाचन हुने व्यवस्था छ ।
सोहीअनुरूप निर्वाचन आयोगले उपनिर्वाचनको तयारी गरेको छ । आयोगले आगामी मंसिर तेस्रो साता स्थानीय तहमा रिक्त जनप्रतिनिधिको निर्वाचन गर्ने गरी आन्तरिक गृहकार्य अगाडि बढाएको छ ।
योसँगै ग्रामथानमा अध्यक्ष पदका आकांक्षीहरू लामबद्ध देखिएका हुन् ।
उक्त पदका लागि नेपाली कांग्रेसका सात, नेकपा एमालेका पाँच जना, नेकपा माओवादी केन्द्रका दुई जना र अरू दुई जनाले स्वतन्त्र उम्मेदवारी दिने तयारी गरेको स्रोतले जनाएको छ ।
कांग्रेसका सत्यनारायण भगत, शेखर विश्वास, एकाराम माझी, बलराम सरदार, तुलसी विश्वास, सूर्यनारायण चौधरी र सबिताकुमारी चौधरी आकांक्षी देखिएका छन् ।
तथापि, सत्यनारायण भगत कांग्रेसका प्रबल दाबेदार रहेको स्रोतको भनाइ छ ।
एमालेका शिवनारायण माझी प्रबल दाबेदार हुन् ।
उनी २०७९ वैशाख २८ गतेको स्थानीय तहको निर्वाचनमा जयप्रकाश गच्छदार थारूसँग १५ सय भोटले हारेका थिए ।
त्यसभन्दा अघि २०७४ सालमा भएको निर्वाचनमा तत्कालीन लोकतान्त्रिक फोरमबाट उठेका जयप्रकाशलाई ५९ मतको झिनो मतान्तरले हराउँदै माझी ग्रामथान गाउँपालिकाको संस्थापक अध्यक्ष बनेका थिए ।
माझीसँगै एमालेका तुलसी विश्वास, नवीन मण्डल, ओमकुमार खाँ, कृष्णकुमार माझी पनि ग्रामथान गाउँपालिका अध्यक्षका आकांक्षीहरू हुन् ।
नेकपा माओवादी केन्द्रबाट भने एलिसा चौधरी र सुनील भगत (झलक) अध्यक्ष पदका प्रत्याशी देखिएका छन् । एलिशा सरदार २०७९ को निर्वाचनमा उपाध्यक्षमा तेस्रो बनेकी थिइन् ।
उपाध्यक्ष गुणावती थारू र कांग्रेसकी भुखनीकुमारी माझीसँग कडा प्रतिस्पर्धा गरेकी एलिशा अब अध्यक्ष पदका भिड्ने तरखरमा छिन् ।
यस्तै, अघिल्लो निर्वाचनमा वडाध्यक्षमा चुनाव हारेका नमोनारायण माझी पनि अध्यक्षको उम्मेदवार बन्ने तरखरमा छन् ।
नमोनारायणले त्यसबेला ग्रामथान १ नम्बरको वडाध्यक्षमा स्वतन्त्र उम्मेदवारी दिएका थिए ।
त्यसबाहेक तत्कालीन अध्यक्ष जयप्रकाश गच्छदार थारूका ‘पिए’ सुवास गच्छदारले अध्यक्षमा स्वतन्त्र उम्मेदवारी दिन लागेका छन् ।
यसरी हेर्दा सदाझैं कांग्रेस र एमालेबीच प्रतिस्पर्धा हुने जनाएको छ ।
आयोगले नगरपालिका प्रमुख, उपप्रमुख तथा गाउँपालिकाका अध्यक्ष, उपाध्यक्ष तथा वडाध्यक्ष गरी रिक्त रहेका ३४ पदका लागि उपनिर्वाचनको तयारी सुरु गरेको हो ।
कोशी प्रदेशका झापा, मोरङ, सुनसरी, तेह्रथुम, ओखलढुंगा र उदयपुरमा गाउँपालिका अध्यक्षसहित सात पद रिक्त रहेका छन् ।
यस्तै, कन्काई नगरपालिका–६ को वडाध्यक्षका लागि उपनिर्वाचन हुने भएको छ भने तेह्रथुमको लालीगुराँस नगरपालिका–८, सुनसरीको गढी गाउँपालिका–६ ओखलढुंगाको मोलुङ गाउपालिका–६, उदपयुरको त्रियुगा नगरपालिका–१२ र बेलका नगरपालिका–८ का वडाध्यक्षका लागि उपनिर्वाचन हुने छ ।
