विराटनगर । कोशी प्रदेश सरकारले आगामी आर्थिक वर्ष २०८१–८२ को वार्षिक नीति तथा कार्यक्रम आज ल्याउँदै छ ।
मुख्यमन्त्री तथा मन्त्रिपरिषदको कार्यालयमा आइतबार बसेको मन्त्रिपरिषदको बैठकले नीति तथा कार्यक्रम स्वीकृत गर्ने निर्णय गरेको थियो ।
सोहीअनुरूप आज अपरान्ह ४ बजे बस्ने प्रदेशसभा बैठकलाई प्रदेश प्रमुख परशुराम खापुङले सम्बोधन गर्दै छन् ।
प्रदेश सभाको बैठक बहिस्कार गर्दै आएको कांग्रेस सोमबारको प्रदेश सभाको बैठकमा भने सहभागी हुने भएको छ ।
आजदेखि प्रदेशसभा बैठकमा सहभागी हुने नेपाली कांग्रेस कोशी प्रदेश संसदीय दलका नेता उद्धव थापाले बताए ।
केन्द्रको निर्देशनअनुसार सोमबारको बैठकमा सहभागी हुने बताउँदै उनले प्रदेश प्रमुखबाट सरकारको नीति तथा कार्यक्रम प्रस्तुत हुने भएकोले उक्त बैठकमा सहभागी हुन केन्द्रबाट निर्देशन आइसकेको बताए ।
मुख्यमन्त्री हिक्मत कुमार कार्की नेतृत्वको वर्तमान सरकार गठनको प्रक्रियाविरुद्ध निवर्तमान मुख्यमन्त्री केदार कार्कीले सर्वोच्च अदालतमा दायर गरेको रिटको सुनवाई नटुंगिएसम्म कांग्रेसले कोशी प्रदेश सभा बैठकमा सहभागी नहुने यसअघि निर्णय गरेको थियो ।
तर सोमबार सरकारको नीति तथा कार्यक्रम आउने भएकोले बैठकमा सहभागी हुने उनको भनाइ छ ।
