विराटनगर । मोरङ क्रिकेट संघको आयोजनामा विराटनगरमा जारी प्रथम कोशी प्रदेश ट्रफी पेप्सी राष्ट्रिय टी–२० च्याम्पियनसिपको उपाधि त्रिभुवन आर्मी क्लब हात पार्न सफल भएको छ ।
आर्मीले शनिबार भएको फाइनल खेलमा कर्णाली प्रदेशलाई नौ विकेटले पराजित गर्दै उपाधि हात पारेको हो ।
उपाधिसँगै आर्मीले नगद पाँच लाखसहित ट्रफी र उप–विजेता कर्णालीले नगर तीन लाखमा चित्त बुझाएको छ ।
जारी सिजनमा तेस्रो पटक फाइनलमा प्रवेश गरेको आर्मीले पहिलो उपाधि चुमेको हो । यसअघि, पिएम कपमा नेपाल पुलिस र केपी ओली कपमा मधेस प्रदेशसँग पराजित भएको थियो ।
कोशी प्रदेश ट्रफीको पहिलो सस्करणको उपाधि हात पार्ने क्रममा कर्णालीले दिएको एक सय ११ रनको लक्ष्य आर्मीले १२ दशमलव २ बलमा १ विकेटको नोक्सानीमा पूरा गरेको थियो ।
पहिलो विकेटका लागि आर्मीको ओपनर सन्तोष कार्की र इमरान शेखले २५ रनको साझेदारी गरेका थिए ।
सन्तोष २१ रनमा क्याच भएपछि मैदानमा प्रवेश गरेका तृतराज दासले आक्रमक शैलीमा जित सुनिश्चित गरे ।
आर्मीको जितमा शेखले ३० बलमा अविजित ३८ रन र तृतराजले ३३ बलमा अविजित ५० रन बनाए ।
च्याम्पियनसिपमा पहिलो अर्धशतक बनाएका दासले २ छक्का र ५ चौका प्रहार गरेका थिए ।
शेख र दासबीच ५४ बलमा ८७ रनको साझेदार गर्दै खेल आफ्नो पक्षमा पारे । कर्णा दिनेश अधिकारीले १ विकेट लिए ।
यसअघि टस जितेर ब्याटिङ गरेको कर्णाली प्रदेशले निर्धारित २० ओभरमा सबै विकेट गुमाई एक सय १० रनको सामान्य योगफल तयार पारेको थियो ।
आक्रमक सुरुआत गरेको कर्णालीका लागि विपिन रावलले २७ रन बनाउँदा कप्तान रवीन्द्र शाहीले २१ रन, मनिष थापाले २१ र दिनेश अधिकारीले १२ रन बनाए ।
आर्मीका तृतराज दास, वसिर अहमद, सहाव आलम र सुमित श्रेष्ठले समान दुई–दुई विकेट लिए ।
च्याम्पियनसिपमा प्लेयर अफ दि टुर्नामेन्ट र प्लेयर अफ द फाईनलको पुरस्कार आर्मीका अलराउन्डर दासले हासिल गरे ।
प्रतियोगिताको उदयमान खेलाडी आर्मीका नितेश पटेल घोषित भए ।
विजेता टोलीलाई कोशी प्रदेशका मुख्यमन्त्री केदार कार्कीले पुरस्कार वितरण गरेका थिए ।
फागुन २२ गतेबाट सुरु भएको प्रतियोगितामा तीन विभागीय र सात प्रदेशको सहभागिता रहेको थियो ।
