विराटनगर । महिला राष्ट्रिय फुटबल टोलीकी मिडफिल्डर प्रीति राईले आफूहरू अझ बलियो बनेर मैदान फर्किने बताएकी छन् ।
शुक्रबार नेपाल फर्किएकी उनले सामाजिक सञ्जाल फेसबुकमार्फत् आफ्ना समर्थकलाई अझ बलियो भनेर मैदान फर्किनेमा आश्वास्त बनाएकी हुन् ।
उनी सम्मीलित नेपाली टोली वाफको उपाधि भिडन्तमा जोर्डनसँग पेनाल्टीमा अभागी साबित हुँदै उपविजेतामा सीमित बनेको थियो ।
सुरुवाती अग्रता बनाएको नेपालले निर्धारित समय २-२ गोलको बराबरी खेलेको भए पनि पेनाल्टीमा ५-३ गोलको हार बेहोरेको थियो ।
स्टार फरवार्ड साबित्रा भण्डारी ‘साम्बा’ नभएको फाइनल खेलमा घाइते बनेपछि राईले मैदान छोड्नु परेको थियो ।
यो नै अन्तिम खेल नभएको बताउँदै राईले लेखेकी छन्, ‘वाफ च्याम्पियनसिप मैले खेलेका अरू प्रतियोगिताभन्दा उत्कृष्ट छ । म यसको निर्णायक खेलमा घाइते बनें, मलाई थाहा छ यो नै अन्त्य होइन । म प्रतिज्ञा गर्छु कि हामी अझ बलियो बनेर मैदान फर्किने छौं । हाम्रो लडाइँ सकिएको छैन, हामी हार्न सक्छौं तर हार स्वीकार्न सक्दैनौं ।’
यस्तै उनले महिला टोलीलाई समर्थन गरिदिएकोमा आभार प्रकट गरेकी छन् । नेपालमा जन्मिएर देशका लागि खेल्न पाएकोमा आफूलाई गर्व लागेको उनको भनाइ छ ।
त्यसैगरी, १८ सय किलोमिटर यात्रा तय गरी आफूहरूको खेल हेर्न आएकोमा धन्यवाद दिएकी छन् ।
