विराटनगर । जोर्डनले साउदी अरेबियामा जारी आठौं संस्करणको पश्चिम एसियन फुटबल फेडेरेसन महिला च्याम्पियनसिप (वाफ) को उपाधि जितेको छ ।
बिहीबार राति साउदीको जेद्दाहस्थित प्रिन्स अब्दुल्लाह अलफेजल स्टेडियममा नेपाललाई पेनाल्टी सुटआउटमा हराउँदै उपाधि जितेको हो ।
निर्धारित समय २-२ गोलको बराबरीमा सकिएपछि खेल पेनाल्टीमा धकेलिएको थियो, जसमा जोर्डनले नेपाललाई ५-३ गोलान्तरले हरायो ।
त्यसअघि खेलको २९औं मिनेटमा नेपालकी सविता रानामगरले गोल गर्दै नेपाललाई सुरुआती अग्रता दिलाएकी थिइन् ।
खेलको ७३औं मिनेटमा जोर्डनले गोल गर्दै खेल बराबरीमा फर्काएको थियो ।
८९औं मिनेटमा पुनः गोल गर्दै जोर्डनले २-१ गोलको अग्रता बनायो ।
खेलको इन्ज्युरी समयमा गीता रानाले पेनाल्टीमा गोल गरेपछि नेपाल बराबरीमा फर्किएको थियो ।
यससँगै प्रतियोगिताको सर्वाधिक सफल टिम जोर्डनले चौथो पटक प्रतियोगिताको उपाधि जितेको छ ।
पश्चिमी क्षेत्र (गल्फ) का देशहरू सम्मिलित यस प्रतियोगितामा नेपालले भने यसपटक डेब्यु गरेको थियो ।
नेपालले आमन्त्रित टोलीको हैसियतमा पहिलो पटक सहभागिता जनाएको हो ।
पहिलो खेलमा सिरियामाथि ४-१ गोलान्तरको जित निकालेको नेपालले दोस्रो खेलमा झन् फराकिलो जित आत्मसात् गर्यो ।
सावित्रा भण्डारी साम्बा एक्लैले पाँच गोल गरेको खेलमा नेपालले इराकमाथि ५-० गोलान्तरको जित निकालेको थियो ।
सो जितसँगै एक खेलअगावै सेमिफाइनल प्रवेश गरेको नेपालले तेस्रो खेलमा प्यालेस्टाइनमाथि ४-० गोलको जित दर्ता गर्यो ।
सेमिफाइनलमा प्रीति राईको गोलको सहायताले लेबनानलाई २-१ गोलले पछार्दै फाइनलमा पुगेको नेपालले आज जोर्डनको सामना गरेको थियो ।
जोर्डनले भने सेमिफाइनलमा प्यालेस्टाइनलाई ५-० गोलान्तरले हराउँदै फाइनलमा प्रवेश गरेको हो ।
त्यसअघि उसले पहिलो खेलमा आयोजक साउदीलाई ३-१ ले हराएको थियो ।
दोस्रो खेलमा ग्वाममाथि ३-० र तेस्रो खेलमा लेबनानलाई २-० गोलले हराएको जोर्डनले पनि जारी प्रतियोगितामा हार बेहोरेको थिएन ।
