विराटनगर । आइसिसी विश्वकप क्रिकेट लिग–२ अन्तर्गत घरेलु टिम नेपाल नामिबियासँग पराजित भएको छ ।
नामिबिया र नेदरल्यान्ड्स सम्मिलित त्रिकोणात्मक सिरिजको तेस्रो खेलमा नेपालले बुधबार नामिबियासँग खेलेको थियो ।
कीर्तिपुरस्थित त्रिवि क्रिकेट मैदानमा भएको खेलमा नेपाल नामिबियासँग दुई विकेटले हारेको हो ।
नेपालले दिएको एक सय ६९ रनको मध्यम लक्ष्य पछ्याएको नामिबियाले ४० ओभरमा आठ विकेटको क्षतिमा एक सय ७२ रन जोड्दै लक्ष्य पूरा गरेको हो ।
नामिबियाका लागि कप्तान जोरार्ड इरास्मस ५२ रन बनाए भने माइकल भान लिंगेनले ३१, जेजे स्मिथले अविजित ३४ र रुबेल ट्रम्पलम्यानले १६ रन बनाए ।
बलिङमा नेपालका कुशल भुर्तेलले तीन विकेट लिदाँ दीपेन्द्रसिंह ऐरी, कप्तान रोहित पौडेल, कुशल मल्ल र ललित राजवंशीले एक एक विकेट लिए ।
त्यसअघि टस हारेर पहिले ब्याटिङको निम्तो पाएको नेपालले ३७.१ ओभरमा सबै विकेटको क्षतिमा एक सय ६८ रन बनाएको थियो ।
नेपालका लागि ओपनर आसिफ शेखले सर्वाधिक ५८ रन बनाउँदा कुशल मल्लले ३६, भीम सार्कीले २६, कुशल भुर्तेलले १८ र करण केसीले १२ रन बनाए ।
बलिङमा नामिबियाका बेर्नार्ड स्कोल्ट्ज र जान निकाले लोफ्टी इएटनले चार चार विकेट लिए भने कप्तान जोरार्ड इरास्मस र ज्याक ब्रसिलले एक एक विकेट लिए ।
जितसँगै तीन खेलबाट चार अंक बनाएको नामिबिया शीर्ष स्थानमा उक्लिएको छ ।
नेपालले तीन खेलबाट दुई अंक बनाएको छ । नेपाल सिरिजको पहिलो खेलमा नामिबियासँग चार विकेटले पराजित भएको थियो ।
दोस्रो खेलमा भने नेपालले नेदरल्यान्ड्सलाई नौ विकेटले हराएको थियो । नेपालले यस सिरिजको चौथो तथा अन्तिम खेल आइतबार नेदरल्यान्ड्ससँग खेल्नेछ ।
नेदरल्यान्ड्सको दुई खेलबाट दुई अंक छ ।
आठ टोली सहभागी आइसिसी विश्वकप लिग–२ मा नेपाल, नामिबिया र नेदरल्यान्ड्ससहित क्यानडा, ओमान, स्कटल्यान्ड, युनाइटेड अरब इमिरेट्स (युएई) र अमेरिका रहेका छन् ।
सन् २०२७ सम्म चल्ले यस लिगमा प्रत्येक टोलीले त्रिकोणात्मक सिरिजको ढाँचामा कूल एक सय ४४ खेल खेल्नेछन् ।
जसमध्ये शीर्ष चारमा रहने टोलीले एक दिवसीय मान्यता जोगाउने छ भने विश्वकप छनोट खेल समेत खेल्न पाउनेछ ।
लिग–२ सिरिजको अघिल्लो लामो चक्रमा नेपालले गतवर्ष पछिल्ला खेलहरूमा लगातार ११ जित निकाल्दै एक दिवसीय मान्यता जोगाउँदै लिग–२ मै रहेको थियो ।
