१–० ले पछि परेको स्थितीलाई उल्ट्याउँदै बार्सिलोनाले ला लिगामा इलचे फुटबल क्लबविरुद्ध जित दर्ता गरेको छ ।
बार्सिलोनाको जितमा मेम्पिस डिपेले ८४औं मिनेटमा निर्णायक गोल गरे ।
पहिलो हाफको ४४औं मिनेटमा फिडेल चाभेसले गोल गर्दै इलचेलाई सुरुवाती अग्रता दिलाएका थिए ।
मिडफिल्डमा बल गुमेपछि बार्सिलोनाका खेलाडीले त्यसलाई नियन्त्रणमा लिन प्रयास गरे पनि सफल हुन नसक्दा पहिलो गोल व्यहोरेको थियो ।
चाभेसको प्रहारलाई बार्सिलोनाका डिफेन्डर डयनी आल्भेस र गोलरक्षक टर स्टेगनले रोक्न प्रयास गरे पनि सफल हुन सकेनन् ।
१–० ले पछि पर्दै पहिलो हाफ सिध्याएको बार्सिलोनाका लागि फेरान टोरेसले दोस्रो हाफको ६०औं मिनेटमा गोल गर्दै बार्सिलोनालाई खेलमा फर्काएका थिए ।
उनी गाभीको स्थानमा दोस्रो हाफको सुरुवातमा नै मैदान प्रवेश गरेका थिए ।
डेम्बेले–अल्बा हुँदै इलचेको सिक्स यार्ड बक्सभित्र आइपुगेको बललाई टोरेसले जालीको दिशा दिएका थिए ।
बार्सिलोनालाई विजयी गराउन ७५औं मिनेटमा मैदान प्रवेश गरेको मेम्पिस डिपे नायक बने ।
पियरे इमरिक अबुमेयाङको स्थानमा मैदान प्रवेश गरेका उनले ८२औं मिनेटमा टोलीका लागि पेनाल्टी जिताएका थिए ।
पेनाल्टी बक्सभित्रबाट सहकर्मीलाई क्रस गर्ने क्रममा डिपेको बललाई इलचेका बारागनले हातले रोकेका थिए ।
सोही क्रममा म्याच रेफ्रीले बार्सिलोनालाई दिएको पेनाल्टीको मौकामा डिपेले सुन्दर गोल गर्दै घरेलु टोलीलाई स्तब्ध बनाए ।
जितसँगै २६ खेल खेलेको बार्सिलोना स्पेनिस अङ्कतालिकाको तेस्रो स्थानमा उक्लिएको छ । समान खेल खेलेका रियल बेटिस ४६ अङ्कसहित चौथो स्थानमा रहँदा ४५ अङ्क बटुलेको एट्लेटिको मड्रिड पाँचौँ स्थानमा छ ।
बार्सिलाेनासँग हार भाेगेकाे इलचे भने २९ अङ्कका साथ तालिकाकाे १४औं स्थानमा छ ।
यता समान २७ खेल खेलेका रियल मड्रिड र सेभिल्ला क्रमशः पहिलो र दोस्रो स्थानमा छन् । ६३ अङ्कस्थित रियल ला लिगाको शीर्ष स्थानमा रहँदा ५५ अङ्क बटुलेको सेभिल्ला दोस्रो स्थानमा छ ।
