कमल थापाले राष्ट्रिय प्रजातन्त्र पार्टी (राप्रपा)बाट अलग भएकाे घाेषणा गरेका छन् ।
राप्रपाका निवर्तमान अध्यक्ष थापाले हेटौंडामा पत्रकार सम्मेलन गर्दै पार्टीबाट राजीनामा दिएकाे घोषणा गरेका हुन् ।
पार्टीभित्र देखिएकाे सैद्धान्तिक विचलन तथा गलत प्रवृत्तिलाई सुधार गर्दै बाँकी राजनीतिक जिवन राप्रपामा नै रहेर बिताउने आफ्नो योजना रहे पनि पार्टीले आफ्नो कुरा सुन्न छाडेपछि यस्तो अप्रिय निर्णय लिन बाध्य भएको उनले बताए ।
पत्रकार सम्मेलनमा बोल्दै उनले निर्मल निवासले बारम्बार पार्टीमा हस्तक्षेप गरेको र यो राम्रो नभएको दाबी समेत गरेका छन् ।
पार्टीबाट अलग भएपनि थापाले नयाँ पार्टी खोल्नेबारे अहिलेसम्म कुनै निर्णय नभइसकेकाे बताए ।
‘यसबारे छलफल गरेर मात्रै अगाडि बढ्छाैँ’ उनले भने बताए, ‘हालसम्म त्यसबारे निर्णय गरिसकेकाे छैन।’
गत मङ्सिरमा भएको महाधिवेशनमा राजेन्द्र लिङ्देनसँग पराजित भएपछि कमल थापा पार्टी नेतृत्वप्रति असन्तुष्ट बनेका थिए ।
असन्तुष्ट रहेका थापाले यसअघि नै पार्टी छाड्ने र नयाँ पार्टी बनाउने चर्चा चलिरहे पनि त्यसलाई नकार्दै आइरहेका थिए ।
पार्टी छाडेकाे घाेषणा गरे लगत्तै सामाजिक सञ्जालमा आफ्नाे भनाइसहितकाे प्रेस विज्ञप्ति जारी गरेका थापाले राप्रपाका कुनै पनि साथीसँग आफ्नो कुनै वैरभाव नरहेको बताएका छन् ।
पार्टीमा रहँदा सहयोग गर्ने सबैलाई धन्यवाद दिँदै विज्ञप्तिकाे अन्त्यमा उनले सबैकाे भलाे हाेस् भन्ने कामना समेत गरेका छन् ।
