नेपालकै सबैभन्दा जेठो विश्वविद्यालय त्रिभुवन विश्वविद्यालय (त्रिवि)मा अनेकाैँ बेथिति छन् ।
त्यसमध्येको एक हो, नतिजा प्रकाशनमा ढिलाइ ।
नतिजा प्रकाशनमा ढिलाइ हुँदा विद्यार्थीहरू मर्कामा परिरहेका छन् ।
अझ, पछिल्लो समय त्रिविले परीक्षा लिएको वर्ष दिनसम्म पनि नतिजा प्रकाशन नगर्दा विद्यार्थी मर्कामा परेका छन् ।
जबकि, त्रिवि नियममै उल्लेख छ, ‘परीक्षा सकिएको तीन महिनाभित्र नतिजा सार्वजनिक गर्नुपर्ने छ ।’
तर अधिकांश विषय तथा तहका परीक्षाको नतिजा सार्वजनिक गर्न त्रिविले ६ महिनादेखि एक वर्षसम्म लगाउने गरेको छ ।
परीक्षा नियन्त्रण कार्यालयको कमजोरीको परिणाम विद्यार्थीले भोगिरहेका छन् ।
स्नातक तह दोस्रो वर्षको केही विषयको परीक्षा गत फागुनमा सञ्चालन भइरहँदा कोरोना सङ्क्रमण फैलिएपछि भदौमा सकिएको थियो ।
अहिले तेस्रो वर्षको परीक्षासमेत फागुनको पहिलो साता सार्वजनिक गर्न परीक्षा नियन्त्रण कार्यालयले तालिका सार्वजनिक गरिसकेको छ ।
तर अघिल्लो वर्षकै नतिजा नआउँदा विद्यार्थीहरू तनावमा छन् ।
स्नातक तह पहिलो वर्षका परीक्षार्थीको पनि फागुनको पहिलो साताबाटै परीक्षाको मिति तय गरिएको छ ।
तर अघिल्लो वर्षको परीक्षाको नतिजा अहिलेसम्म सार्वजनिक भएको छैन ।
अर्को परीक्षा आउन लाग्दा पनि अघिल्लो वर्षको नतिजा नआउँदा विद्यार्थी अन्योलमा परेका छन् ।
यता, परीक्षा नियन्त्रक पुष्पराज जोशीले नतिजा सार्वजनिक गर्न जनशक्ति अभाव रहेकाले नतिजा सार्वजनिक गर्न ढिलो भएको बताउँछन् ।
कार्यालयमा हाल रहेका कर्मचारीमध्ये सबै कर्मचारी सूचना प्रविधिमा अभ्यस्त नहुँदा झन् समस्या हुने गरेको त्रिविले बताउँदै आएको छ ।
जोशीका अनुसार पनिकामा कुनै बेला २२४ जना कर्मचारी कार्यरत थिए ।
विभिन्न शाखा मर्ज गरेर उक्त कर्मचारी दरबन्दी १८० जनामा झारिएको छ ।
तीमध्ये पनि अहिले १४१ जना मात्रै कार्यरत छन् ।
परीक्षा सञ्चालन तथा नतिजा प्रकाशनको काम व्यवस्थित बनाउन अझै ४० जना कर्मचारी चाहिने नियन्त्रक जोशीले बताए ।
परीक्षा र नतिजा प्रकाशनका काममा मानविकी तथा सामाजिक शास्त्र सङ्कायमा धेरै समस्या रहेको पनिकाले जनाएको छ ।
पनिकालाई परीक्षा र नतिजा ढिलो गर्ने आरोप मात्रै लाग्ने गरेको तर जनशक्ति व्यवस्थापनका काममा भने चासो नदिएको जोशीको गुनासो छ ।
यस्तै, प्राध्यापकबाट उत्तरपुस्तिका परीक्षण र सम्परीक्षण ढिलो हुँदा पनि नतिजा प्रभावित हुने गरेको छ ।
पनिकाकै गोप्य शाखाका एक कर्मचारीका अनुसार कुनै विषयमा प्राध्यापकले सम्परीक्षण गर्न लगेको उत्तरपुस्तिका तीन महिनासम्म पनि फिर्ता नगर्ने प्रवृत्ति छ ।
यस्तो समस्या व्यवस्थापन सङ्कायअन्तर्गतका विषयमा धेरै छ ।
समयमै परीक्षा र नतिजा सार्वजनिक नहुँदा विद्यार्थीहरू निजामती तथा सङ्गठित संस्थाले आह्वान गर्ने कर्मचारी भर्नासम्बन्धी परीक्षामा सहभागी हुनबाट पनि बञ्चित हुने गरेका छन् ।
यो पनि:
