कोरोना भाइरसको नयाँ भेरिएन्ट ओमिक्रोन अन्य भेरिएन्टको तुलनामा अत्यधिक सङ्क्रामक भएपनि कम घातक रहेको अध्ययनको निष्कर्ष छ ।
भाइरस सरिसकेपछि मानिसमा लक्षण देखा पर्न लाग्ने अवधि पनि कम देखिएको छ ।
यसअघिका भेरिएन्टमा सङ्क्रमण भएपछि चारदेखि पाँच दिनमा लक्षण देखिन्थ्यो ।
डाक्टर भिसेन्ट सोरियानोका अनुसार ओमिक्रोन सङ्क्रमितसँगको सम्पर्कमा पुगेको व्यक्तिमा एक दिनमै शरीरमा भाइरसहरू बढ्न सुरु हुन्छ ।
सोरियानो स्पेनको इन्टरनेसनल युनिभर्सिटी अफ ला रियोजाका सङ्क्रामक रोग विशेषज्ञ पनि हुन् ।
उनका अनुसार ओमिक्रोन सङ्क्रमित मानिसमा दुईदेखि तीन दिनमा लक्षण देखिने हुन्छ ।
सङ्क्रमणका सुरुवाती दिनमा मानिसले बढी सङ्क्रमण फैलाउन सक्छन् ।
ओमिक्रोनको हकमा लक्षण देखिनुभन्दा एक वा दुई दिनअघि र लक्षण देखिएको दुईदेखि तीन दिनसम्म यो भाइरस अरूलाई सर्न सक्ने ठानिएको छ ।
ओमिक्रोन शरीरमा सात दिनसम्म रहने देखिएको बताउँदै डाक्टर सोरियानोले परीक्षणमा पुष्टि भएको तीनदेखि पाँच दिनसम्म मात्रै भाइरस सङ्क्रामक हुने वा अरूलाई सर्न सक्ने बताएका छन् ।
लक्षण नदेखिएका मानिसमा सङ्क्रमण रहिरहने अवधि चाहिँ लक्षण भएका व्यक्तिहरूसँग समान हुने उनको भनाइ छ ।
अमेरिकाको रोग नियन्त्रण तथा रोकथाम केन्द्र (सिडिसी)ले सङ्क्रमण पुष्टि भएका व्यक्तिहरूलाई आइसोलेसनको अवधि घटाएर पाँच दिन पुर्याएको छ ।
सङ्क्रमण भइ लक्षण देखिएको पाँच दिनको आइसोलेसनपछि अरूसँग घुलमिल हुन मिल्ने निर्देशिका प्रकाशित गरेको छ ।
पाँच दिनपछि कुनै लक्षण नभएको वा स्वास्थ्यमा सुधार हुँदै गएमा आइसोलेसनबाट निस्कन सकिन्छ ।
तर ज्वरो छ भने ज्वरो रहँदासम्म अलग्गै बस्नु पर्छ ।
साथै, अन्य मानिस भेट्दा मास्क लगाउनु पर्ने र लक्षण देखिएको पहिलो दिनबाट १० दिनसम्म यात्रामा सकेसम्म निस्कन नहुने बिबिसीमा उल्लेख छ ।
नेपालमा कोरोना सङ्क्रमण पुष्टि भएकामध्ये ८८ प्रतिशतमा नयाँ भेरिएन्ट ओमिक्रोन रहेको स्वास्थ्य तथा जनसङ्ख्या मन्त्रालयले जनाएको छ।
मन्त्रालयका सहप्रवक्ता डाक्टर समीरकुमार अधिकारीले टेकुस्थित राष्ट्रिय प्रयोगशालामा एस जिन पोजेटिभ भएका ३२ नमुनाको जिन सिक्वेन्सिङ गर्दा २८ वटा नमुनामा ओमिक्रोन र चार नमुनामा डेल्टा भेरिएन्ट पुष्टि भएको जानकारी दिए ।
एस जिन पोजेटिभ भएका ८८ प्रतिशतमा ओमिक्रोन पुष्टि भएको उनले जानकारी दिए ।
यो नतिजा हेर्दा नेपालमा पनि अन्य मुलुकमा जस्तै ओमिक्रोन भेरियन्टले डेल्टालाई प्रतिस्थापन गरेको डा.अधिकारीको भनाइ छ ।
